O presidente saínte dos Estados Unidos, Donald Trump, non recoñeceu a súa derrota nas eleccións presidenciais do pasado 3 de novembro durante a súa primeira aparición pública en oito días, hoxe venres, na que con todo buscou capitalizar os avances fronte a unha vacina contra a covid-19.

Sen facer nin unha soa mención aos comicios ou ao seu resultado, o mandatario subliñou nunha intervención na Casa Branca que nos últimos nove meses a súa Administración "iniciou a maior mobilización na historia do país. no desenvolvemento e a fabricación de terapias e vacinas nun tempo récord". 

Nese sentido, quixo atribuír ao seu Goberno os progresos por parte da farmacéutica Pfizer, que o luns anunciou que a súa vacina contra a covid-19 era eficaz nun 90 %, por encima do requirido polos reguladores estadounidenses, o que permite augurar unha rápida autorización de emerxencia para a súa posta ao dispor do público.

"Como resultado da Operación Velocidade da Luz, Pfizer anunciou o luns que a súa vacina para o virus da China é efectiva en máis dun 90 %. Isto excede de lonxe calquera expectativa", dixo Trump. E criticou que Pfizer dixese que non formaba parte desa operación da súa Administración, o que cualificou como unha "terxiversación desafortunada, son parte": "por iso démoslles 1.950 millóns de dólares, foi un erro desafortunado que fixeron cando dixeron que traballarían para lograr unha autorización de emerxencia". 

Biden logra 306 delegados tras vencer en Xeorxia

Este venres déronse a coñecer as proxeccións dos medios de comunicación estadounidenses dos resultados dos comicios nos dous últimos estados que quedaban, Xeorxia e Carolina do Norte. O presidente electo, o demócrata Joe Biden, gañou os comicios presidenciais en Xeorxia, mentres Trump o fixo en Carolina do Norte, o que non cambia o resultado das eleccións a nivel nacional nas que o exvicepresidente foi declarado vencedor, segundo as proxeccións de medios de comunicación.
 

Biden acumula 306 delegados e Trump, 232 do total de 538 que compoñen o Colexio Electoral. En Estados Unidos proclámase gañador da Presidencia aquel candidato que some un mínimo de 270 delegados nese organismo. Trump non recoñeceu aínda a súa derrota e afirma que houbo fraude, sen ofrecer probas.