O presidente electo de Estados Unidos, Joe Biden, chegou a Washington para tomar as rendas dun país atafegado por unha converxencia de crises derivadas da pandemia e as divisións políticas, que confía en afrontar cunha rotunda chamada á unidade.

Horas antes de converterse no presidente número 46 da historia dos Estados Unidos, Biden abandonou emocionado o estado onde lanzou a súa carreira política, Delaware, e viaxou a Washington para reunirse coa que será a primeira muller vicepresidenta dos Estados Unidos, Kamala Harris.

Ambos participaron xuntos no seu primeiro acto en Washington antes da investidura deste mércores: unha cerimonia de homenaxe ás vítimas da pandemia nos EUA, onde unhas horas antes alcanzouse o sombrío récord de 400.000 mortes por covid-19.

Homenaxe solemne

"Para curar temos que lembrar, e é difícil ás veces lembrar, pero (...) é importante facer iso como país", dixo Biden nunha breve e solemne cerimonia fronte ao monumento a Lincoln, un dos máis  icónicos da capital.

Biden, Harris e as parellas de ambos -Jill Biden e Doug Emhoff, respectivamente- gardaron silencio mentres o contorno do estanque reflector situado fronte ao monumento a Lincoln se iluminaba, por primeira vez na historia, con 400 luces que representaban as vidas perdidas debido á enfermidade.

Unha investidura atípica

A cerimonia sentou o ton para a atípica xornada de investidura deste mércores, constrinxida tanto polas limitacións derivadas da pandemia como polos temores a novos incidentes violentos, tras o asalto ao Capitolio do pasado 6 de xaneiro.

As rúas do centro de Washington, normalmente repletas antes de calquera investidura, están cercadas por altos valos e pechadas ao tráfico e ao paso dos viandantes, baixo a atenta mirada de ata 25.000 militares da Garda Nacional, cinco veces máis que os que hai en Iraq e Afganistán.

Ademais dese despregamento de seguridade sen precedentes para unha investidura presidencial, a xornada deste mércores contrastará con outras pola ausencia de público no National Mall, a enorme chaira que se estende desde o Capitolio ata o monumento a Lincoln.

Os convidados

Só uns 1.000 convidados poderán presenciar o discurso de Biden en persoa desde a escalinata oeste do Capitolio, fronte aos 200.000 que adoitaban ocupar os asentos de honra durante cerimonias previas.

A maioría son lexisladores estadounidenses, aínda que tamén estarán os expresidentes Barack Obama (2009-2017), George  W. Bush (2001-2009) e Bill Clinton (1993-2001), xunto ás súas respectivas esposas, Michelle Obama, Laura Bush e Hillary Clinton.

O vicepresidente saínte, Mike Pence, asistirá tamén á cerimonia, ao contrario que Donald Trump, quen será o primeiro mandatario en 152 anos que non asiste á investidura do seu sucesor, e xa estará na Florida para cando Biden xure o seu cargo.

O discurso

O discurso de investidura de Biden durará entre 20 e 30 minutos, máis que os 16 que durou o de Trump hai catro anos, e terá un ton optimista, segundo o seu equipo.

"O discurso está estruturado arredor do tema da unidade", dixo á axencia EFE un dos seus asesores, que pediu o anonimato.

"Tenderá a man a todos os estadounidenses e pedirá a cada cidadán que forme parte do intento de facer fronte aos desafíos extraordinarios que enfrontamos", engadiu. A fonte recoñeceu que esa chamada á unidade se produce "nun momento de crise sen precedentes", non só pola pandemia, senón debido á desconfianza nas institucións e no resultado das eleccións que sementou Trump.

Cambios na política dos EUA

O mandatario electo chegará ao poder cunha axenda ambiciosa, e no seu primeiro día no poder xa planea enviar un proxecto de reforma migratoria ao Congreso e ordenar o regreso de Estados Unidos ao Acordo de París sobre o clima, entre outras medidas.

Así se recolle nun comunicado difundido polo equipo de transición, onde se precisa que a nova Administración suspenderá ademais o veto de entrada a residentes de certos países musulmáns.

Axuda económica ás familias máis necesitadas; reforzo da loita contra a pandemia do coronavirus e da crise económica derivada daquela, figuran tamén na longa lista das que serán as primeiras medidas de Biden, dirixidas "non só a reverter os graves danos da Administración Trump, senón tamén a empezar a que o país avance".

Sobre a OMS, o novo presidente quere volver cooperar con este organismo, que considera "fundamental" para coordinar a resposta internacional á covid-19, e "facer que os estadounidenses e o mundo estean máis seguros".

Biden reestruturará o Goberno para coordinar unha resposta nacional unificada á pandemia e asinará unha orde executiva pola que se creará o posto de coordinador de resposta á covid-19, un alto funcionario que despachará directamente co presidente.

No ámbito da política ambiental, o novo titular da Casa Branca asinará hoxe mesmo un documento para a reincorporación dos EUA ao Acordo de París, así como unha orde executiva dirixida a abordar o cambio climático que promova a xustiza ambiental.

Impulsar a igualdade, a xustiza racial e a defensa das minorías, así como poñer freo de maneira inmediata á construción do muro con México son os obxectivos doutras medidas que, en forma de ordes executivas, directrices, memorandos ou cartas, adoptará Biden unha vez que asuma a presidencia, dentro de só unhas horas.

A nota do seu equipo de transición di que se trata de iniciativas dirixidas a cumprir as promesa que Biden fixo aos estadounidenses na súa campaña electoral.