CRTVG

Buscar

O Goberno abre a man para que se poida viaxar entre provincias ou incluso comunidades na fase 3

Publicado o 01/06/2020 13:24

Os desprazamentos entre provincias dunha mesma comunidade autónoma ou mesmo entre autonomías que desde o domingo 7 de xuño estean en fase 3 -Galicia solicitaraa para o luns 8- é unha posibilidade que se abre coa sexta e última prórroga do estado de alarma, segundo explicou este luns o ministro de Transportes, Mobilidade e Axenda Urbana, José Luís Ábalos.  

"Pódese establecer a mobilidade dentro dunha mesma comunidade autónoma ou entre comunidades autónomas que estean na mesma fase", explicou Ábalos nunha entrevista en TVE.

A sexta e definitiva prórroga do estado de alarma que o Goberno solicitará ao Congreso dos Deputados contempla deixar en mans das comunidades sutónomas que entren na fase 3 (a última prevista no plan de transición) a duración e as condicións da mesma, salvo no que respecta á mobilidade, aspecto que seguirá controlando o Executivo.  

Ábalos explicou que se o estado de alarma termina o 21 de xuño para todo o país non será posible seguir restrinxindo a mobilidade entre provincias como ata agora. Pero a partir do 7 de xuño, coa última prórroga, será posible naqueles territorios que estean en fase 3, se así o deciden e a evolución da epidemia o permite, que se poida "establecer un nivel de mobilidade ben dentro dunha comunidade autónoma ou mesmo entre comunidades que estean nunha mesma fase", precisou o ministro.

Galicia dá por feito que haberá mobilidade entre provincias

Precisamente, a circulación entre provincias é unha das principais demandas da Xunta desde que comezou o proceso de desescalada. De feito, o seu presidente, Alberto Núñez Feijóo, avanzou este domingo que, se o Estado delegaba nas autonomías a xestión da fase 3, "unha das primeiras cousas" que ditaría a Administración galega sería "recuperar a mobilidade interprovincial".  

Así o asegurou na conferencia de prensa posterior á reunión telemática co presidente do Goberno central, Pedro Sánchez, e o resto de líderes autonómicos. Con todo, minutos despois, o propio Sánchez comparecía ante os medios e matizaba que será o Estado o que se reserve o control da mobilidade.  

A pesar das palabras de Ábalos este luns, fontes da Xunta apuntan a Europa Press que haberá que esperar á a publicación e aprobación do real decreto de ampliación do estado de alarma para coñecer o alcance desa delegación de competencias en fase 3, en que toda a comunidade galega espera entrar o vindeiro luns 8 de xuño.  

De ser así, Galicia "asumirá a propia decisión, no exercicio das súas competencias, de recuperar a mobilidade dentro das catro provincias, as sete cidades e os 313 concellos", adiantou Feijóo na súa conferencia de prensa deste domingo.

O ministro tamén confirmou o anuncio feito pola presidenta das Baleares, Francina Armengol, con respecto a que a corentena imposta aos turistas procedentes do estranxeiro se levantará o 21 de xuño, cando se levante o estado de alarma, no arquipélago, adiantándose á data do 1 de xullo prevista nun principio polo Goberno.  

Ábalos explicou que se trata de pór en marcha un proxecto piloto de "corredores seguros" para voos que teñan como orixe e destino lugares con niveis baixos de contaxios por coronavirus, como pode ser tamén Canarias.  

Eses días de proba nos arquipélagos permitirán por tanto preparar a apertura máis xeneralizada do país ao turismo, engadiu o ministro.  

Ao preguntarlle polos apoios que o Goberno solicitará este mércores no Congreso para esta última prórroga do estado de alarma -tendo en conta que se garantiu o apoio do PNV e a abstención de ERC- Ábalos indicou con respecto ao voto de Ciudadanos, que ata agora votou si a todas as prórrogas, que non cambiaron as circunstancias sanitarias que xustifican o mantemento do estado de alarma até o 21 de xuño. Agora ben, precisou que el non leva a negociación cos grupos.