O ministro de Transportes, Mobilidade e Axenda Urbana, José Luis Ábalos, asegurou este mércores en Bruxelas que o Estado ten capacidade suficiente para responder ás necesidades de liquidez que lle están trasladando as aeroliñas máis afectadas pola crise do coronavirus, que obrigou a manter a frota aérea en terra durante meses, pero subliñou que non se contempla a vía do rescate.

"O que vai facer o Estado é tentar garantir e manter estas compañías que caracterizamos de estratéxicas, pero non hai rescate porque non se nos están expondo un rescate", declarou á prensa en Bruxelas, tras o cal confiou en "non chegar a iso"

Ábalos viaxou á capital europea no que foi o seu primeiro voo ao exterior desde o inicio do confinamento imposto para tratar de conter a pandemia e reuniuse coa comisaria de Transportes, Adina Valean, que en plena crise avisou por carta a España e outra decena de países de que vía problemas na súa aplicación das regras da UE en materia de protección dos pasaxeiros aos que se cancelaron voos.

O BNG repróchalle a Ábalos que non se reúne coas vítimas de Angrois

O encontro tamén serviu a Ábalos para convidar a comisaria proximamente a España para presenciar a presentación da estratexia de mobilidade, dixo o ministro, pero tamén para falar en detalle sobre o plan de reconstrución que propuxo o Executivo comunitario e que os socios da UE deben negociar agora. Sobre este plan, Ábalos pediu á comisaria poder contar cos recursos deste instrumento "o máis pronto posible", porque ademais da importancia da contía coa que se dote e dos obxectivos e políticas polas que se aposte será clave "cando van chegar eses recursos" aos estados membros.

"É unha indecencia que o ministro priorice a reunión coa comisaria sobre as vítimas do accidente de Angrois, que levan medio ano solicitándolle un encontro", sinala nun comunicado de prensa, no que a portavoz do Bloque apunta que "nin PP, nin PSOE nin Podemos teñen o máis mínimo interese por coñecer a verdade e proporcionar xustiza e reparación ás vítimas, porque, senón, desde os sucesivos gobernos cumpriríase o mandato de Bruxelas de abrir unha comisión técnica".

Miranda lembra que o accidente do Alvia produciuse fará sete anos (agora en xullo) e xa hai máis de ano e medio que a Comisión Europea (en xaneiro de 2019) abriu un procedemento de infracción contra o Estado español por "incumprimento da lexislación europea en materia de seguridade ferroviaria".