Os indicadores da pandemia de covid en Galicia seguen a deixar datos para a esperanza. Continúa o seu descenso. Aínda que algo máis lento desde hai días, pero nótase na caída de infeccións activas (-3) e de contaxios diarios, 26 ata as 18 horas do venres polos 28 do reconto previo. Os casos activos son 413 en Galicia.

A ocupación hospitalaria estabilízase e segue en 26 o número de persoas ingresadas. O Sergas informa de que son sete os pacientes con covid que precisan atencións nas UCI, un menos que a xornada anterior, e outros 19 en cama convencional en cuarto illado, un máis.

Desde o comezo da pandemia contaxiáronse 182.899 persoas, das que xa se curaron do virus 179.871 e faleceron 2.649.

Galicia deixou de estar en situación de emerxencia sanitaria tras a publicación no Diario Oficial de Galicia (DOG) do decreto que levanta esta condición na que estabamos desde marzo de 2020. E o Sergas informou que este sábado non houbo mortes por coronavirus en Galicia.

Situación por áreas sanitarias

As distintas demarcacións presentan nesta xornada datos semellantes aos do día previo. A de Lugo e a de Pontevedra están libres de enfermos de covid en planta, non así nas unidades de críticos. E nos hospitais de Ferrol, Ourense, Santiago e Vigo non hai enfermos nas UCI.