A Mariña australiana puxo en servizo o primeiro dos dous buques de aprovisionamento loxístico encargados aos estaleiros Navantia. É o HMAS Supply II, que se vai encargar de transportar subministración e prestar apoio á forza naval do territorio insular.

Segundo informa a navieira pública española nun comunicado, o buque de tipo Auxiliary Oiler Replenishment (AOR) construíuse nas instalacións de Navantia en Ferrol e rematouse na base naval de Garden Island, no oeste de Australia, a finais de 2020.

O presidente de Navantia, Ricardo Domínguez, considera que a entrada en servizo do buque HMAS Supply II "marca un fito significativo para todos os que estiveron implicados". "Malia os moitos desafíos, incluída a pandemia da covid-19, o Goberno australiano, Navantia, Navantia Australia e as industrias de ambos os dous países traballaron de xeito colectivo", engade.

Baseado no buque de aprovisionamento en combate Cantabria, transportará combustible, carga, auga, alimentos, munición, equipamentos e repostos para prestar apoio operativo á forza naval e para operacións humanitarias e de axuda en emerxencias.

O Ministerio de Defensa australiano e Navantia Australia encargaranse do mantemento do buque. O segundo encargado a navieira española, o Stalwart (III), chegará a Australia a mediados de ano para os traballos finais e terá o seu porto en HMAS Stirling, no oeste do continente.