"Eu, por exemplo, xa collín unha media gripe, non foi unha gripe coma as outras fortes, pero xa teño algún síntoma e por iso veño á farmacia", comenta unha señora.

As medidas para ter baixo control a covid demostraron ser o mellor antídoto para previr a gripe. Notouse na ausencia de ingresos hospitalarios, pero tamén nas farmacias, que comprobaron como as vendas caían en picado. Agora empezan a recuperarse.

"Empeza a notarse un incremento das vendas de antigripais, pero non son para propiamente antigripais, son para síntomas de catarros ou arrefriados", informa ​Iván Fernández, técnico de farmacia.

"Aínda estamos moi lonxe das cifras de 2019, pero si que parece que pode empezar a haber máis movemento deste tipo de produtos", apunta ​María Argibay, directora técnica de Cofano.

Despois da última campaña, as farmacéuticas afrontan esta con moitas incógnitas.

"Os laboratorios soen facer precampañas de cara ao outono e fanas ao principio do verán e este ano, con todo, atrasáronas e aínda están comezando agora, o cal indica tamén pois que era unha incógnita o que ía suceder, pero que todo apunta a que este ano haberá algo de aumento", conta María Argibay, directora técnica de Cofano.