A mediados de outubro esta empresa de reparto de paquetería reforza o seu cadro de persoal para asumir un previsible incremento do volume de traballo ata finais de xaneiro.

"Sobre todo en períodos de rebaixas ou de ofertas puntuais, como o Black Friday e o Nadal, aumenta moito o tráfico de paquetería pequena cara a domicilios particulares. Despois deses períodos soben as recollidas de produtos para cambios de talle, cousas que xente merca e despois non é o que quería ou o que pensaba", comenta o xerente dunha empresa de reparto coruñesa.

O incremento das compras online modificou o deseño das rutas de reparto. Hai oito anos as empresas eran as destinatarias do 90% dos paquetes. Hoxe case a metade entréganse a particulares. Os españois somos os europeos que mercamos máis electrónica e moda online.

"O 80% da mercadoría das tendas online coas que traballamos son pequena electrónica, como móbiles ou tabletas, e tamén roupa de toda clase: zapatos, pezas deportivas, roupa de temporada, de rebaixas..."

O ano pasado, a facturación do comercio electrónico creceu máis dun once por cento que en 2017. En España preto de vinte millóns de persoas realizan compras online.