No Reino Unido agrávase a crise no sector eléctrico pola escalada dos prezos da luz. Hoxe confirmouse a quebra doutras dúas compañías distribuidoras. En total xa son seis as empresas distribuidoras que quebraron no último mes, o que afecta, de momento, a subministración dun millón e medio de fogares.

O encarecemento da enerxía no Reino Unido fai moi difícil a supervivencia das distribuidoras menos potentes, que non poden competir coas grandes. Os expertos cren que a maioría acabará por desaparecer, porque o Goberno xa dixo que non vai haber axudas para estas empresas.

As perspectivas tampouco son boas para os consumidores: está previsto que a factura da luz suba arredor dun 30 % no mes de outubro.