CRTVG

Buscar

AstraZeneca e o regulador británico din que non hai probas de que a vacina faga coágulos

Publicado o 15/03/2021 11:36

A axencia británica reguladora do medicamento (MHRA, en inglés) sinalou este luns que as probas existentes non apuntan a que a vacina de AstraZeneca cause coágulos sanguíneos nos seus receptores, algo que tamén defendeu a farmacéutica nun comunicado.

"Estamos a examinar de preto os informes, pero tendo en conta o gran número de doses administradas e a frecuencia con que poden ocorrer os coágulos sanguíneos de forma natural, as probas dispoñibles non indican que a vacina sexa a causa", destacou o responsable de seguridade das vacinas na MHRA, Phil Bryan.

O regulador saíu así ao paso da decisión de Irlanda, anunciada o domingo, de suspender temporalmente a aplicación do preparado de AstraZeneca contra a covid-19.

"A xente debería seguir indo poñerse a súa vacina contra a covid-19 cando se lles pida", agregou Bryan nun comunicado.

A intervención do regulador británico prodúcese despois de que a propia compañía farmacéutica emitise onte á noite un comunicado no que reiteraba a seguridade do seu produto e negaba que producise coágulos.

"Unha coidadosa revisión de todos os datos dispoñibles de máis de 17 millóns de persoas vacinadas na Unión Europea e o Reino Unido coa vacina de AstraZeneca para a covid-19 non mostrou ningunha proba dun maior risco de  embolia pulmonar, de trombose venosa profunda (TVP) ou de trombocitopenia en ningún grupo de idade, xénero, lote ou nun país particular", dixo.

Segundo os datos recompilados pola compañía, ata o 8 de marzo houbo 15 casos de TVP e 22 de embolias pulmonares entre os receptores da vacina na UE e o Reino Unido. Esa proporción, subliña AstraZeneca, "é moito máis baixa do que podería esperarse de forma natural nunha poboación xeral dese tamaño, e é similar á doutras vacinas con licenza contra a covid".

Ademais, insiste, o número de trombos producidos entre quen participou nos ensaios clínicos, a pesar de ser baixo, foi aínda menor en quen recibiu a vacina e non un placebo. Tampouco houbo, subliña a compañía anglo-sueca, probas dun maior sangrado entre os 60.000 participantes nos ensaios.

"En canto á calidade, tampouco se confirmou ningún problema relacionado con algún lote da nosa vacina usado en Europa ou o resto do mundo. Fixéronse e estanse facendo test pola nosa banda e de forma independente polas autoridades sanitarias europeas e ningún destes mostra causas para preocuparse", reitera.

A semana que vén, a Axencia Europea do Medicamento (EMA, en inglés) publicará o seu informe mensual de seguridade na súa páxina web, lembra  AstraZeneca.

Dinamarca, Noruega, Islandia, Bulgaria, Irlanda e Países Baixos suspenderon o uso da vacina, mentres que varios países como Austria, Estonia, Letonia, Lituania e Luxemburgo retiraron un lote en concreto ao detectar casos de tromboses.

A EMA recomendou a semana pasada seguir administrando o preparado ao considerar que "os beneficios da vacina seguen superando os seus riscos".