No polígono lugués do Ceao amencían hoxe coa noticia dun novo roubo na zona. Desta volta foi na nave dun ximnasio de crossfit. O dono decatouse ás nove desta mañá. Está convencido de que os ladróns buscaban cartos porque o remexeron todo, e non levaron nada. 

Os ladróns asaltaron de madrugada este box de crossfit de Lugo, situado nun dos extremos do polígono do Ceao. Foi un dos donos do ximnasio o que se decatou do roubo cando se dispoñía a acceder ás instalacións a primeira hora da mañá. Sorprendeuse ao ver a porta entreaberta e enseguida viu que faltaba a pechadura e que o cilindro estaba tirado no chan.

"Como un día normal, vin abrir ás nove da mañá e vin a porta aberta. Pensei que a deixara o home da limpeza, pero decateime de que faltaba a pechadura e entrei e xa vin todo revolto".

Cando accedeu ao interior da nave descubriu todo revolto. Os ladróns remexérano todo, tanto nos caixóns e papeis do mostrador da entrada coma nos vestiarios. Alí a imaxe era esta, a roupa e o calzado de deporte dos usuarios estaba tirada polo chan. Todo apunta a que os ladróns abriron caixa a caixa buscando diñeiro pero foron coas mans baleiras dado que non o deixan aquí nin tampouco material informático de valor. Á falta de ordenalo todo e facer balance non detectaron que levaran material das instalacións pero si roupa e calzado de deporte dalgúns usuarios.

"Revolveron no mostrador da entrada e nos vestiarios. Estaba tirada a roupa e o material dos atletas. Parar paráronse porque no box revolvérono todo, tempo estiveron, non foron cinco minutos. Está claro que viñan buscando cartos porque material non falta nada, só estaba revolto. O material é moi pesado e íalle custar levalo, viñan ao que viñan".

A Policía Científica acudiu á nave onde procederon a tomar pegadas no lugar dos feitos. Agora tentarán tamén recadar as imaxes das cámaras de seguridade dos diversos negocios da zona para tratar de dar cos autores do roubo.