As tubaxes da auga da traída sufriron roturas dous días consecutivos na parroquia de Landrove, en Viveiro. Unha vez reparado o primeiro rebentón, a rede volveu rebentar noutro punto, desta volta á beira mesmo dunha vivenda, onde están a traballar os operarios para substituír a tubaxe rota. Como resultado, os veciños do barrio da Ponte quedaron sen subministración ata en dúas ocasións en menos de 24 horas.

"Cando o soubemos foi cando se ía deitar o meu home, ás doce da noite. Abriu a billa do lavabo e viu que non había auga. Pola mañá xa había".

"O que pasou foi que rompeu a tubaxe de fibrocemento, que ten moitos anos de vida útil. E iso unha vez rompe, probablemente volva romper ao lado. Hai 48 horas rompeu nun punto e ao día seguinte, máis ou menos á mesma hora, volveu romper, e sae un caudal de auga moi elevado. A tubaxe abastece o que é o depósito de cabeceira de todo Viveiro e sae moita cantidade de auga".

Hai tres anos, a rede de abastacemento de auga xa rebentara xunto á mesma vivenda, que daquela tamén resultara anegada. Os veciños da zona sinalan que o problema non se acabará de resolver mentres non se substitúa a tubaxe enteira.

"Dentro non hai máis que reparaduras diso, e entón habían de instalar outra tubaxe mellor".

"Hai tres anos xa rompera outra vez, máis ou menos na metade da costa. O que problema é que cando rompe cerca do depósito ou na metade da costa baixa unha gran cantidade de ramas e de follas, que cando chegan a esta reixa atráncase todo, empeza a subir a cota de auga e entra na vivenda".

As tubaxes que rebentaron teñen uns 45 anos de antigüidade.