As residencias de maiores de Galicia contabilizan 30 falecementos
• Supoñen o 26 por cento da cifra total de mortes en Galicia relacionadas co coronavirus
• Hai 521 contaxios nestes centros, co principal foco en xeriátricos DomusVi de Cangas e Vigo
• Nos centros de discapacitados o número de persoas contaxiadas é de 68
O número de usuarios de residencias de maiores de Galicia contaxiados por coronavirus que faleceron elévase a 30, mentres que os contaxios ascenden a 521 (o 12,8 por cento do total de contaxios en Galicia), 393 entre residentes e 128 entre traballadores, segundo os datos de onte á noite divulgados este mediodía pola Consellería de Política Social.
Os 30 falecementos supoñen o 26 por cento do total de mortes rexistradas en Galicia. O número máis alto de falecementos rexistrouse na residencia privada Domusvi de San Lázaro, en Santiago, con sete residentes mortos; en DomusVi Cangas, Barreiro (Vigo) e O Portádego (A Coruña), cinco; en Bellolar (A Coruña) e A nosa Señora da Esperanza de San Rosendo, en Ourense, dúas; e en Castro Caldelas, Celanova, Divino Mestre de Ourense, e DomusVi Carballo, un.
O xeriátrico de Cangas mantense como o principal foco de contaxio por coronavirus en Galicia, con 108 residentes e 17 traballadores.
DomusVi Barreiro contabiliza 83 casos, 72 residentes e 11 traballadores; San Carlos (Celanova), 62 casos, 44 usuarios e 18 traballadores; O Portádego (A Coruña), 56 casos, 38 usuarios e 18 traballadores; e DomusVi San Lázaro, (Santiago), 34 casos, 23 traballadores e 11 usuarios.
O número de residencias de maiores en Galicia con polo menos un contaxio sitúase en 36.
Centros de discapacitados
En canto aos centros de discapacitados, a cifra de contaxios elevouse ata os 68, 37 entre usuarios e 31 entre coidadores, cinco máis ca onte.
O CAPD de Redondela acumula 40 positivos, 25 entre usuarios e 15 entre profesionais, e o de Sarria, 7 entre usuarios e 9 entre traballadores.
En total son 13 os centros en que se contabiliza polo menos un caso.