As casetas do polbo do recinto feiral do San Froilán, que abrirán as portas ao público dentro de tres semanas, van manter o prezo das racións do seu produto estrela. Valerán 12 euros, ao igual que o ano pasado, cando o importe da ración dun cuarto de quilo de polbo se incrementara nun 50 por cento e subira catro euros.

No resto das polberías da cidade tamén manterán os prezos, que oscilan entre 13,50 os 200 gramos e 15 euros os 400 gramos.

José Antonio Paredes, hostaleiro: "O prezo é o mesmo ca o do ano pasado. Exactamente igual, a 15 euros. E o peso, pois son entre 360 e 400 gramos. É unha ración bastante grande".

Pablo Pérez Mella, hostaleiro: "O peso da ración está entre 200 e 210 gramos, dependendo do corte. Tivemos que poñela a 13,50, e este ano están mantendo os prezos".

Que non suban os prezos das racións de polbo no San Froilán é algo sempre ben recibido polos lugueses.

"Paréceme ben que se manteñan. Xa me parece bastante pagar a ración de polbo a 13 euros, e a 15".

"Paréceme ben que manteñan o mesmo prezo ca o ano pasado".

O viño, que tamén subira a metade, e mais as racións de pan e de cachelos tamén manterán o prezo este ano nas patronais luguesas.