Son as primeiras doses da vacina do coronavirus que se van repartir en España. Pasaron a noite nun cuartel da Garda Civil en Burgos e chegaban ás 7:30 desta mañá ao centro loxístico da farmarcéutica Pfizer en Guadalaxara. 

Viñan nun colector especifico con temperatura controlada para manter a vacina a 70 graos baixo cero. A vacinación comezará ás 8:30 da mañá do domingo nesta residencia de maiores de Guadalaxara. Os primeiros en recibila serán un ancián e un traballor do centro.

O Ministerio de Sanidade distribuirá as vacinas semanalmente entre as Comunidades autónomas. Por motivos de seguridade, non se desvelaron os lugares onde se van almacenar. Chegarán, procedentes desde Bélxica, 350 mil doses cada semana ata o mes de marzo.

En total, máis de catro millóns e medio de vacinas, que permitirán inmunizar 2.295.000 persoas nos próximos tres meses. Recibirana nesta primeira fase os grupos de maior risco: os residentes e o persoal dos centros de maiores, o persoal sanitario  e os grandes dependentes.