As tormentas castigaron a cidade de Ourense cunha forza poucas veces vista. A tromba de auga, vento e ata pedrazo deixou a cidade ao bordo do colapso, a Policía Local recibiu máis dun cento de chamadas. Gran parte das alertas foron por tellados, galerías desprendidas e balcóns estragados. A cuberta do pavillón dos Remedios, acabado de reformar, voou polos aires. Pero tamén moitas estruturas de edificios de vivendas.

O peor foi contra as oito da tarde. Nesa franxa, e en só dez minutos, das sete corenta ás sete cincuenta, caeron máis de vinte litros por metro cadrado e o vento chegou, de repente, aos 76 quilómetros por hora, o cal colleu por sorpresa moitos veciños e negocios. 

Causou fallos eléctricos e deixou os semáforos sen funcionar e as estradas anegadas, con balsas de auga en moitos puntos. Houbo un regueiro de accidentes de tráfico e colapsos na circulación: tanto no centro da cidade como nos accesos a Ourense, significativamente pola A-52.

Houbo momentos en que os servizos de emerxencias non daban feito e ían dun sinistro a outro, dende un coche envorcado preto do Couto, saídas de vía, a decenas de árbores caídas, moitas delas na zona da Universidade, algunhas partidas e outras mesmo arrancadas do chan.

Polo de agora non hai constancia de danos persoais graves. Agora toca cuantificar esta gran cantidade de desperfectos, despois dunha treboada que, aínda que durou poucos minutos, a cidadanía non vai esquecer por moito tempo.

Avaliación dos danos

Segundo o concelleiro de Seguridade cidadá, Telmo Ucha, efectivos de Protección Civil, Policía Local e bombeiros traballan dende primeira hora para solucionar os danos máis urxentes. Mentres continúen coas tarefas, non se poderá facer un informe completo das desfeitas.

O alcalde da cidade, Gonzalo Pérez Jácome, asegurou que aínda se está a “retirar maleza” e nas piscinas de Oira tentan cuantificar os prexuízos.

No que respecta ao pavillón dos Remedios, o rexedor agradeceu o traballo efectuado polos corpos de seguridade e polos equipos municipais. Do mesmo xeito, confirmou importantes danos no teito da piscina de 50 metros.

A propia conselleira de Infraestruturas, Ethel Vázquez, está previsto que vaia comprobar in situ durante a xornada o estado das instalacións, inauguradas hai uns meses pola Xunta.