Fin de semana negra nas estradas galegas. Tres persoas morreron en máis de media ducia de accidentes que houbo. Entre os máis graves, un home atropelado na autoestrada do Atlántico á altura de Pontevedra, que está pendente de confirmar a súa identidade e unha vítima que ía nun patinete eléctrico en Poio.

Todo está pendente da autopsia que se está a facer hoxe para coñecer as causas da morte dun home de 32 anos en Poio que ía nun patinete eléctrico. A vítima non levaba casco e barallan que puido levar un golpe na cabeza ao caer pero non descartan que lle fora mal e antes de acabar no chan.

"Cando chegamos xa estaba a ambulancia medicalizada, que certificou o falecemento", di Manuel Vicente Camaño, de Protección Civil. 

Un peón faleceu atropelado na AP-9 en Pontevedra. O condutor do vehículo que o bateu non puido esquivalo. Outros tres coches víronse implicados ao colidiren entre si. O sinistro aconteceu nas proximidades da ponte da Barca no carril en dirección a Vigo. Abriuse unha investigación para determinar as causas polas que o peón camiñaba pola autoestrada.

Na aldea de Placín, en Manzaneda, morreu un ancián que bateu co tractor contra unha casa. A vítima de 85 anos idade era veciño da aldea. O vehículo apenas presentaba danos xa que o choque se produciu a moi baixa velocidade. Investiaga se foi unha morte natural.

Outro accidente fatal ocorreu en Pontevedra, na estrada de Ourense. Un coche botouse da vía na parroquia de Mourente e envorcou. A condutora quedou ferida. perdeu o control do vehículo nunha recta e foi bater contra outro, que estaba estacionado.

"Subía unha muller conducindo un vehículo e quedou durmida no coche, e iso ocasionou que pegara cun estacionado, envorcou e pegou en dous máis", di unha testemuña do sinistro.

A Garda Civil investiga por un delito contra a seguridade viaria un veciño de Ribadumia. Chocou contra o muro dunha vivenda no Facho, na parroquia de Castrelo, en Cambados. O home, que resultou ileso, conducía cunha taxa de alcol que duplicaba a permitida e tamén deu positivo en drogas.

Feridos quedaron dous menores nun accidente de tráfico en Xinzo de Limia. O sinistro tivo lugar nun cruzamento sen sinalización, preto do campo de fútbol. Nun dos vehículos viaxaban dous nenos de 21 meses e 8 anos, que foron trasladados ao centro de saúde da capital limiá por precaución. Todos os implicados no sinistro son familiares.