O emprendemento feminino galego medra trece puntos nun ano e faino por riba da media española. En Galicia hai xa máis mulleres que homes liderando proxectos empresariais. O 57% está en marcha por iniciativa de mulleres, fronte ao 42% dos proxectos que emprenderon os homes. 

O emprendemento feminino galego medra por cuarto ano consecutivo. As mulleres lideran xa máis da metade das iniciativas emprendedoras de Galicia. Perden medo ao risco e equilibran o seu papel na taxa de actividade, que aumentou medio punto en 2018, ata o seis por cento. É unha das conclusións dun estudo sobre o emprendemento en todo o mundo.

No caso de Galicia sitúa a idade media do emprendedor entre os 41 e 42 anos e incide en que un de cada tres ten estudos universitarios. Unha porcentaxe que sobe entre os máis novos, onde medra o interese por emprender. Buscan ter máis independencia no traballo. O aumento de ingresos e a necesidade son outras das motivacións dos emptrendedores galegos.

Case a metade das iniciativas nacen para o sector servizos. O principal obstáculo segue sendo o financiamento. Case o 70% usa aforros propios ou de familiares como capital semente. E no caso de Galicia hai outro dato: o dez por cento das iniciativas consolídanse. Catro puntos por riba da media española.