Para o PSOE, os resultados reforzan as súas alianzas de esquerdas a nivel estatal. Para José Luis Ábalos, o secretario de Organización do partido, "a gran perdedora destas eleccións foi unha dereita que considera que Cataluña é un problema, porque é incapaz de entender a diversidade e a pluralidade".

Pola súa parte, Podemos cre que o electorado recompensou o seu papel na coalición, un papel, asegurou a súa voceira, Isa Serra, que consiste en "dicir as verdades" dentro do Goberno.

Vox tamén fai lectura en clave estatal e xa se ven líderes dunha alternativa ao bloque da esquerda. Santiago Abascal considera que teñen "a responsabilidade de construír unha alternativa completa á fronte popular separatista que goberna España, unha alternativa ao socialismo sen escrúpulos e corrompido, unha alternativa ao comunismo totalitario".

Pero a pesar do adianto, o Partido Popular non se sente ameazado por Vox. Pablo Montesinos, vicesecretario de Comunicación do partido, considera que estes resultados non son extrapolables a nivel nacional e asegura que non cambiarán o seu rumbo "porque España necesita moderación e centralidade".

En Ciudadanos, xa se manifestou o sector crítico. Piden cesamentos na cúpula do partido, pero nin Carrizosa nin Arrimadas contemplan dimitir. A presidenta conta con seguir á fronte da formación co apoio do partido.

Cataluña vai seguir marcando a axenda nacional. Mañá mesmo, Esquerra pedirá no Congreso dos Deputados a convocatoria dun referendo de autodeterminación.