Alíviase a presión nas UCI, que cae aos niveis de comezos de xaneiro
• Os casos activos descenden en Galicia. Soben nas áreas de Vigo e Lugo
• A taxa de positividade leva máis de cinco semanas por debaixo do 5 %
Volven baixar os casos activos de covid-19, logo de que onte subiran lixeiramente por primeira vez en mes e medio. Segundo os últimos datos do Sergas, hai 2.658 persoas enfermas de covid-19 en Galicia, 27 menos ca onte. Detectáronse 148 novos positivos, dos cales 124 foron a través dunha proba PCR.
Por áreas sanitarias, o balance é o seguinte:
A Coruña: 1.064 (-12)
Vigo: 472 (+15)
Pontevedra: 222 (-8)
Santiago: 288 (-5)
Lugo: 210 (+5)
Ferrol: 232 (-11)
Ourense: 170 (-11)
Alivio na presión asistencial
No que respecta aos hospitais, hai un total de 293 persoas ingresadas (-20), das cales 235 permanecen en planta (-13) e 58, nas UCI (-7). É a cifra total de hospitalizados máis baixa dende o 18 de outubro. Se reparamos nas UCI, hai un mes estaban ingresados máis do triple de pacientes do que hai agora (187).
Por desgraza, a cifra que continúa medrando é a de vítimas. Van xa 2.306 persoas que faleceron por mor do coronavirus en Galicia, logo de que o Sergas notificara a morte de tres enfermos desta doenza.
Positividade por debaixo do 2 %
Aumentou o número de probas PCR realizadas ata as 6.489, segundo o Sergas (+1.788). Delas, deron positivo 124, 19 máis ca onte. Isto implica unha taxa de positividade baixa, do 1,91 %. Van 40 días por debaixo do 5 %.