Un bombeiro resultou esta tarde afectado pola intensa calor cando traballaba na extinción dun incendio no soto dunha nave de Oleiros, segundo informou Emerxencias 112.As lapas declaráronse sobre as seis e media da tarde no soto dunha nave dedicada á venda de mobles, situada na Avenida das Mariñas.

A proximidade do aparcadoiro e o intenso fume acumulado motivou a mobilización de varias dotacións de bombeiros procedentes dos parques de Arteixo, Coruña e Betanzos, que permanecerán no lugar ata a completa extinción do incendio e a ventilación do espazo, cheo de fume.

Un dos bombeiros resultou afectado cando traballaba na extinción do lume, pero xa foi trasladado consciente e estable ao Complexo Hospitalario Universitario da Coruña ( CHUAC) para ser sometido a un recoñecemento médico.Os efectivos do servizo local de Protección Civil colaboran neste operativo, do mesmo xeito que os axentes das Policías Local e Autonómica.