As escavacións no castro de Viladonga deixaron ao descuberto un novo tesouro. Trátase dunha machada de bronce con máis de 2.300 anos de antigüidade. É un achado moi importante, segundo os arqueólogos, que pode ofrecer moita información sobre este asentamento romano, xa que a peza foi localizada no seu interior e non noutro contexto.

É unha peza moi singular pola súa complexa decoración, entre a que se distingue o prótomo dun touro, un xabaril e un carneiro. É unha machada pequena de 13 centímetros posiblemente usada para o sacrificio de animais, na segunda Idade de Ferro do noroeste peninsular.

O achado foi descuberto moi preto dunhas escaleiras que conducen ao alxibe. Tamén se encontraron restos de cerámica, carbón e ósos. Trátase do quinto machado sacrificial localizado en Galicia e este verán xa se exhibirá no museo do castro.