As xuntas de accionistas do grupo automobilístico italiano Fiat Chrysler (FCA) e do francés PSA aprobaron hoxe case por unanimidade a fusión que creará Stellantis, o cuarto fabricante mundial de automóbiles en termos de volume, con vendas estimadas de máis de oito millóns de unidades.

A operación, anunciada en outubro de 2019, obtivo o 99,15 % dos votos dos accionistas presentes na reunión de FCA e o 99,95 % dos de PSA, ambas se celebraron sen público e foron transmitidas por videoconferencia. Fiat Chrysler comunicou momentos despois da votación que ambas as firmas automobilísticas estudan completar a fusión o 16 de xaneiro e que "a negociación das accións ordinarias de Stellantis comezará o luns 18 de xaneiro no Mercato Telematico Azionario de Milán e en Euronext Paris, e o martes 19 de xaneiro na Bolsa de Nova York".

Esta unión entre iguais, que se formalizará nunha data aínda por fixar, dará nacemento ao cuarto maior fabricante do mundo en termos de volume de vendas, só por detrás do alemán Volkswagen, a nipoa Toyota e a alianza franco xaponesa Renault- Nissan- Mitsubisthi. Contará con máis de 400.000 empregados e unha capitalización bolsista de máis de 40.000 millóns de euros; e xerará unhas sinerxías estimadas en 5.000 millóns de euros ao ano.

Por volume de negocio, será o terceiro fabricante mundial de automóbiles, con 167.000 millóns de euros, en base a cifras de 2019 (FCA tivo unha facturación duns 108.000 millóns de euros e PSA duns 59.000 millóns de euros, excluíndo Faurecia). Pero, ademais, sumando os datos de Fiat Chrysler e PSA de 2019 (sen contar con Faurecia), Stellantis terá un beneficio operativo axustado estimado de preto de 12.000 millóns de euros; unha marxe operativa axustada en torno ao 7 % e un fluxo de caixa libre operativo relacionado co segmento de automoción de máis de 5.000 millóns de euros, tal e como remarcou o conselleiro delegado de FCA, Mike Manley, na Xunta de Accionistas de Fiat Chrysler. "É unha fusión histórica", describiu o presidente de Fiat Chrysler, John Elkann, no seu discurso ao comezo da asemblea do grupo italiano, que quintuplicou  o seu valor nos últimos 10 anos.

"Stellantis é unha unión de dous socios con ideas afíns, que se unen para construír algo único e grandioso", proseguiu o empresario italiano, que tamén será presidente de Stellantis. "Estamos listos para esta fusión, para esta creación de valor, para pasar á seguinte etapa desta fabulosa historia", sinalou, pola súa banda, Carlos Tavares, o "número un" de PSA e futuro conselleiro delegado de Stellantis, momentos antes de que se coñecese o resultado da votación da Xunta de Accionistas francesa.

A nova entidade terá sede en Holanda, pero continuará cotizando nas bolsas de París, Milán e Nova York. Presentará unha gran complementariedade xeográfica, "ao combinar a excelente posición de PSA en Europa coa fortaleza de FCA en América do Norte e América Latina", o que permitirá a Stellantis gozar de "unha presenza global e equilibrada", e "minimizar o impacto das recesións cíclicas que poden ocorrer nunha rexión específica", dixo Manley. O gran reto será redeseñar a estratexia combinada do grupo noutras rexións xeográficas, incluída A China.

Tavares dirixirá un grupo de catorce marcas, entre as que se atopan Fiat, Chrysler, Alfa Romeo, Jeep, Maserati, Peugeot, Citroen ou Opel. E ademais terá que lidar coa promesa das dúas casas automobilísticas de non incorrer no peche de plantas tras a operación. En Italia, FCA recibiu este ano un préstamo de 6.300 millóns de euros (uns 7.748 millóns de dólares ao cambio actual), no marco das liñas de crédito estatais postas a disposición por Roma para as empresas con problemas pola covid-19, e o Estado italiano sen dúbida esixirá garantías ao grupo de que manterá os niveis de emprego no país.

En xullo, despois de recibir o crédito, FCA confirmou que respectará o investimento prometido en Italia por valor de 5.000 millóns de euros, a pesar da situación de crise derivada da pandemia do coronavirus.

FCA e PSA comunicaron en outubro de 2019 que querían fusionarse e en setembro de 2020 modificaron algúns termos do acordo inicial para afrontar a crise do coronavirus, sen alterar o valor económico e os obxectivos do proxecto. Aumentaron as sinerxias de 3.700 millóns a 5.000 millóns anuais e tamén pactaron que FCA distribuiría entre os seus accionistas un dividendo de 2.900 millóns de euros antes do peche da operación, fronte aos 5.500 millóns de euros fixados anteriormente.

A participación do 46 % que ten o grupo galo na provedora automobilística Faurecia repartirase entre os accionistas de Stellantis inmediatamente despois do peche da operación.