A Xunta abre este martes case a metade dos albergues da rede pública e así dar servizo ao aumento de peregrinos no Camiño de Santiago. Ese incremento notouse a partir do mes de abril e desde entón chegaron case 8.000 camiñantes, 2.400 na primeira semana de xuño. A actividade retómase primeiros nos establecementos das rutas que teñen menos oferta de aloxamentos privados.

No Camiño Francés e no Inglés abren cinco establecementos, catro no de Fisterra-Muxía e no do Norte, no Camiño Primitivo abren tres, dous o fan no Portugués e na Vía da Prata abren dez albergues. Será o 1 de xullo cando abran o resto dos establecementos, incluído o do Monte do Gozo e o novo albergue de Vigo.

Abren con todas as garantías de seguridade e sanitarias para acoller aos peregrinos. Manteñen o límite de ocupación no 30 %, atendendo ás últimas recomendacións do comité clínico, e aquelas persoas que por escrito declaran formar parte dun grupo burbulla, poderán compartir cuarto.

A Xunta formou "300 hospitaleiros" e elaborou guías e axudas aos establecementos para que adecuaran os locais ás normas sanitarias.