CRTVG

Buscar

A Xunta pídelle ao Goberno "tempo" para As Pontes e ve "irresponsable" que busque trasladar "culpas aos demais"

Publicado o 28/10/2019 12:19

O conselleiro de Economía e Industria, Francisco Conde, pediulle ao Goberno en funcións "tempo" para a central térmica das Pontes, mentres que cualificou de "irresponsable" que desde o Executivo se busque trasladar "as culpas aos demais".   

Conde respondeu así ás declaracións da ministra de Transición Ecolóxica en funcións, Teresa Ribera, que denunciou falta de colaboración por parte da Xunta e asegurou que Endesa "enganou" coas súas contas para dar "unha falsa impresión" de viabilidade.   

"O propio de cada goberno é asumir as súas responsabilidades", sentenciou Conde, a preguntas dos xornalistas, despois de participar nun foro sobre 'A industria ante o contexto enerxético actual'. Por iso, pediulle ao Executivo de Sánchez "responsabilidade" e que "asuma as súas competencias". "Ten que expoñer unha transición coherente con Europa e coa realidade do noso tecido produtivo", insistiu.   

Antes, na súa intervención, acusou o Goberno en funcións de "negarlle" a Galicia unha "transición enerxética xusta" fronte á negociación dunha estratexia neste ámbito coas autonomías de Asturias, Aragón e Castela e León, segundo expuxo.   

Ao Executivo lembroulle tamén que "Europa non pide que as centrais se pechen en 24 horas"."O que se propón a Endesa e a Galicia é unha ruptura enerxética que está fóra do traballo que impulsa a UE", apostilou o conselleiro, quen avogou por "homologar" a térmica ao resto de centrais europeas; lograr un prezo competitivo con respecto ao gas e "traballar" na procura de alternativas industriais.

Durante a súa conferencia, Conde incidiu tamén en que as comunidades autónomas necesitan que España se vexa como un país "que achega confianza". "E necesitamos que as decisións que saen de Madrid permitan o correcto funcionamento das competencias que temos transferidas", recalcou.

E é que, na súa intervención, aludiu a unha situación política en España "que non chama ao optimismo" pola existencia dun Goberno en funcións e pola situación en Cataluña. "Unha enorme inestabilidade que pode provocar danos de incalculables consecuencias", incidiu o conselleiro, quen apuntou tamén a unha "desaceleración" na economía.   

Neste contexto, reprochou a actuación do Goberno en funcións con Galicia. "Non sabemos canto tempo máis se vai a atrasar a chegada da AVE", reprochou. Mentres, culpou o Goberno de pór  "contra as cordas" a sectores como a industria electrointensiva ou as centrais térmicas.   

Se no caso das térmicas, culpou ao Goberno socialista de favorecer o seu peche "desde a inacción", reprochoulle non aprobar aínda un estatuto electrointensivo. "Se non hai estatuto, non hai prezo", dixo ao reclamar un custo enerxético competitivo; pero tamén medidas como a supresión do imposto sobre a produción da enerxía eléctrica ou do céntimo verde no carbón.

En canto aos retos existentes dixo que desde a Xunta se está traballando para que Galicia sexa "unha excepción ante a incerteza que hai en España". Respecto diso, apuntou ás medidas que porá en marcha o Executivo galego para favorecer o sector industrial, entre os que citou a captación de novos investimentos. "Imos destinar máis de 200 millóns de euros a facilitar esa Galicia máis innovadora e competitiva", aseverou.   

Tamén avogou por unha reinvención do modelo produtivo "que en Galicia hai que afrontar desde o realismo", recalcou; pola "diversificación" e por aproveitar "as oportunidades" da transición enerxética. "Galicia está a apostar por ser máis verde do que é", dixo lembrando que este ano entrarán en funcionamento unha vintena de parques eólicos.

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí