CRTVG

Buscar

A Xunta, o Ministerio e Endesa reuniranse a vindeira semana para abordar o futuro das Pontes

Publicado o 02/12/2019 21:29

O presidente da Xunta, Alberto Núñez Feijóo; a ministra de Transición Ecolóxica, Teresa Ribera; o alcalde das Pontes, Valentín González Formoso, e representantes de Endesa reuniranse a próxima semana en Madrid para abordar o futuro da central térmica deste municipio coruñés, sobre a que pesa a ameaza de peche. Así o avanzou este luns o conselleiro de Economía, Francisco Conde, en declaracións aos medios en Santiago, tras participar nun encontro co grupo local en defensa da continuidade da planta. Nesta cita tamén estiveron os propios Feijóo e González Formoso, así como membros do comité de empresa da central, transportistas e auxiliares.

Conde sinalou que se vai a trasladar ante o Ministerio e Endesa "a necesidade e a urxencia de que se tomen medidas" para "garantir a continuidade da planta". "Hai unha posición clara de que a central das Pontes non pode pechar", deixou claro. Todo iso, despois de que Endesa fixase o ano 2022 como data límite para eliminar o carbón, co consecuente aceleramiento no peche da térmica das Pontes. Con todo, posteriormente, o rexedor pontés explicou que non ten confirmación "oficial nin oficiosa" sobre ese encontro, que segundo o conselleiro "está confirmado", aínda que sen data pechada.

 Pola súa banda, o alcalde das Pontes asegurou ter acceso aos "datos" das probas realizadas pola propia central térmica nas que se avalía o uso de biocombustibles para reducir o carbón. Afirma que "as probas son viables desde o punto de vista técnico", mentres que "desde o punto de vista económico hai que avalialo", para o que "se necesita un pouco máis de paciencia". "Eses biocombustibles proceden do mundo rural galego e necesítase ver a escala, a localización dos mesmos, a loxística e o comportamento dos mesmos desde o punto de vista loxístico", explica González Formoso. "Co cal, non se pode chegar a unha conclusión en tres días de proba, non é xusto e é un engano á cidadanía", sentenza. Ademais, alertou da "preocupación" en Galicia "sobre a garantía de subministración se pecha unha central térmica de 1.400 megavatios".

O conselleiro de Economía, Francisco Conde, demandou que a central reactive a súa actividade, á vez que se avalía como reducir o carbón e o prezo da enerxía para que a planta "sexa competitiva". Todo iso, para "dar unha resposta a 700 familias" cuxos postos de traballo dependen desta decisión, co fin de que haxa "unha transición xusta". Nesta liña, a Xunta reclama que o Goberno central "tome decisións na mesma medida que se están tomando no resto de Europa", pois "o resto de países europeos está a manter a actividade dos seus centrais". "Ningunha decisión pode ter un impacto negativo no emprego", avisa.

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

02/12/2019