A Xunta de Galicia decidiu este venres intervir temporalmente a residencia de anciáns do concello de Leiro. Segundo os últimos datos que nos achegan dende esta residencia de maiores de Leiro, de 74 usuarios que hai, 69 están contaxiados. Un tivo que ser hospitalizado, os que teñen síntomas son, de momento, leves. Ademais, 15 traballadores deron tamén positivo.

A conselleira de Política Social, Fabiola García,  explicou que esta decisión obedece ao "elevado número de contaxios" rexistrado, que provocou que o Goberno galego enviase "medios humanos e materiais que eran necesarios nestes momentos para coidar e atender ás persoas maiores".

A práctica totalidade dos internos neste centro infectáronse co virus, aínda que García advertiu de que están "a aparecer aínda novos casos", polo que pediu á poboación en xeral un "último esforzo" para afrontar "días difíciles" e as semanas que se aveciñan, debido a que van ser "moi complicadas".

Nestes momentos, dúas residencias están intervidas en Galicia, a Quercus de Leiro, e a de Paz y Bien, en Tui (Pontevedra).

Na residencia de Leiro aínda non administraran ningunha dose da vacina. Si a recibiran xa en Ribeira, onde hai 85 contaxios entre residentes e traballadores.Son os dous gromos máis grandes que hai hoxe en residencias galegas.

Soben a 438 os usuarios contaxiados en residencias

O número de usuarios de residencias de maiores galegas con coronavirus elevouse este venres a 438 (16 máis) ao notificarse, entre outros, 41 casos no centro de maiores de Leiro que foi intervido pola Xunta.

Segundo o balance diario de covid-19 en xeriátricos da Xunta, nas últimas 24 horas reportouse un falecemento; 36 altas en usuarios, entre elas, as de 25 residentes da Paz y Bien de Tui (Pontevedra), e 53 positivos.

Entre os novos casos están tamén nove usuarios da DomusVi de Carballo, un da residencia do Incio, un de Sampedro I da Merca e outro da residencia Blanco Amor de Boborás.

O número de traballadores contaxiados incrementouse ata os 224 (doce máis), ao darse tres altas e notificarse quince positivos: seis en Leiro, seis en Arzúa, dous na Blanco Amor de Boborás e un na Sampedro II da Merca.

Respecto a os centros galegos de atención a persoas con discapacidade, deron positivo tres internos e seis traballadores da Pai Menni de Betanzos.

Así, o número de usuarios contaxiados elevouse a 75 (tres máis), dos que 44 están na residencia  Pai Menni de Betanzos, 29 na nosa Señora de Fátima e Cristo Rey de Crecente, un na DomusVi de Bóveda e outro en Bergondo.