Empresas hoteleiras e restaurantes de máis de 25 traballadores son os destinatarios dunha nova liña de axudas da Xunta para un sector fortemente castigado pola pandemia. Segundo o Clúster do Turismo de Galicia cumpren estes requisitos unhas 140 empresas en Galicia.

Estas axudas poden ser destinadas a gastos derivados da transformación dixital, a mellora da imaxe da empresa, a actuacións de mellora da accesibilidade, así como a creación de produto do destino Galicia. Poderán solicitalas por tramos desde 40 mil euros ata 75 mil, segundo o número de empregados.

O Goberno galego leva invertidos no plan de choque do sector turístico 70 millóns de euros o ano pasado e case 30 no que vai de ano, ademais dos 90 millóns de euros para a hostalería.