CRTVG

Buscar

A Xunta desactiva o nivel dous de alerta en Vilariño de Conso

Publicado o 15/09/2020 18:24

• Os incendios afectan a quince localidades da provincia de Ourense, onde xa arderon máis de 9.000 hectáreas | Os focos máis grandes son o de Lobios e Vilariño, con 2.000 hectáreas calcinadas | O lume en Maceda está xa extinguido tras queimar 220 hectáreas 

A superficie queimada por incendios forestais que afectan a 15 municipios de Ourense, a maioría rexistrados ao longo da pasada fin de semana, rolda xa as 9.000 hectáreas, segundo as últimas estimacións da Consellería do Medio Rural. Tal e como informa a Xunta, como focos de maior envergadura seguen os que continúan activos en Vilariño de Conso e en Lobios, con máis de 2.000 hectáreas arrasadas.

Tamén permanecen activos focos noutro oito municipios (Cualedro, Chandrexa de Queixa, Rairiz de Veiga, Vilardevós, Manzaneda, A Mezquita, Laza e Montederramo) mentres están estabilizados os doutro tres (Vilar de Barrio, A Gudiña e Muíños) e controlado un na Pobra de Trives.O de Maceda quedou xa extinguido tras queimar 222 hectáreas.

Un dos de maiores dimensións é o de Vilariño de Conso, onde xa foi desactivada a situación 2 de emerxencia pola proximidade das chamas ás casas dos núcleos de Soutogrande e Soutelo. Nesta localidade, segundo informou a Consellería de Medio Rural, as hectáreas afectadas están ao redor das 2.000. O lume de Vilariño segue activo desde a súa declaración ao redor das 2,20 da madrugada do domingo e nel traballaron ata o momento 32 brigadas, 16 axentes, 14 motobombas, catro pas, 14 helicópteros, e nove avións por parte da Xunta.

Ademais, o Estado enviou á Unidade Militar de Emerxencias (UME) e o Ministerio para a Transición Ecolóxica apoiou os labores con dous avións anfibios e a Brigada de Reforzo de Incendios Forestais (BRIF) de Laza.

Tamén segue sen control o lume de Lobios, con outras 2.000 hectáreas queimadas no Parque Natural Baixa Limia-Serra do Xurés, concretamente na parroquia de Río Caldo, desde as 19,40 da tarde do sábado. A este punto se desprazaron ata o momento un técnico, 21 axentes, 49 brigadas, 28 motobombas, unha pa, 11 helicópteros e seis avións.

Por parte do Goberno central, o dispositivo despregado en Lobios consta dun avión anfibio 'Canadair' de 5.500 litros, un helicóptero 'Kamov' de 4.500 litros, dous avións de carga en terra e as BRIF de Tineo (Asturias) e Tabuyo del Monte (León).

Cualedro sofre dous incendios na parroquia de Montes --onde tamén se chegou a aplicar a alerta por proximidade das chamas ao núcleo de Carzoá--. O máis grande iniciouse o domingo e afecta a unhas 1.300 hectáreas. O segundo comezou na madrugada do luns e afecta, segundo as últimas medicións, a unhas 80 hectáreas.

Tamén continúan activos na provincia de Ourense outros focos en Chandrexa de Queixa, con 500 hectáreas arrasadas na parroquia de Queixa; en Rairiz de Veiga, na parroquia de Sabariz, con 300 hectáreas queimadas; e en Vilardevós, na parroquia de Vilar de Cervo, onde afecta tamén a 350 hectáreas.

En Manzaneda, seguen activos dous incendios diferentes que tamén contaron con medios de extinción do Ministerio para Transición Ecolóxica. O de maior dimensión leva calcinadas xa 450 hectáreas de superficie na parroquia de Cernado, polo que nas últimas horas duplicou a súa gravidade.

Mentres tanto, o segundo, que en realidade se corresponde con dous que se unificaron, xa queimou 400 hectáreas en San Martiño e en Paradela, case o triplo do notificado esta mañá. Outros dous que continúan sen control, pero de menor envergadura, son o da parroquia de Camba, en Laza (60 hectáreas queimadas desde a tarde do sábado), e o da parroquia de Gabín, en Montederramo (30 hectáreas desde a noite deste luns)

Estabilizados permanecen tres lumes noutros tantos concellos. O de Vilar de Barrio, declarado en Rebordechau, afecta a unha superficie provisional dunhas 700 hectáreas, mentres que o da Gudiña, en Pentes, arrasou unhas 150.

O terceiro que está estabilizado desde a noite do luns afecta o Parque Natural da Baixa Limia-Serra do Xurés, concretamente no termo municipal de Muíños, parroquia de Requiás, que no entanto queimou unha superficie de nove hectáreas.

Baixo control está un rexistrado na Pobra de Trives, concretamente na parroquia de Pena Petada, tras arder unhas 50 hectáreas; mentres que o de Castro de Escuadro, en Maceda, segundo informou Medio Rural a través de Twitter, quedou xa extinguido pasadas as 14,00 horas deste martes despois de ter queimado 222 hectáreas.

Xa fóra da provincia de Ourense, en Ribas de Sil (Lugo), continúa controlado o incendio da parroquia de Peites, que ten catro focos simultáneos que afectan a 60 hectáreas

Ademais dos medios de extinción da Consellería do Medio Rural, o Ministerio para a Transición Ecolóxica enviou efectivos provincia para colaborar na extinción. De feito, a través dun comunicado, informa de que "a mellora das condicións meteorolóxicas" permitiu que desde primeira hora deste martes se puidesen incorporar os avións anfibios que este luns "non puideron intervir por mala visibilidade". En total, este martes interviñeron por parte do Ministerio 23 medios aéreos e catro BRIF nos municipios de Lobios, Manzaneda, A Mezquita, Montederramo e Vilariño de Conso.

 

 

 

 

 

 

Noticias web

15/09/2020