AXENCIAS

O proxecto de orzamentos da Xunta para 2022 inclúe uns beneficios fiscais polos que os galegos deixarán de pagar 522 millóns de euros, debido ás rebaixas xa establecidas e outras novas, como no tramo autonómico do IRPF que beneficiará un 90 % de contribuíntes.

Así o explicou o conselleiro de Facenda Miguel Corgos en conferencia de prensa tras entregar o proxecto orzamentario ao presidente do Parlamento Miguel Santalices para iniciar a súa tramitación coa previsión de que estas contas, que ascenden a 11.627 millóns de euros, un 6,9 % máis que este ano se se exclúen os fondos extraordinarios pola pandemia entren en vigor o 1 de xaneiro.

Corgos especificou que a parte autonómica do IRPF terá unha rebaixa dos tipos en todos os tramos inferiores aos 60.000 euros, sobre todo por baixo de 35.000 euros, que beneficiará 1,1 millóns de contribuíntes, pero tamén haberá rebaixas no imposto de transmisións patrimoniais, de patrimonio e de sucesións, entre outros. Os 522 millóns de euros que deixarán de ingresar as arcas públicas supoñen 50 millóns máis que neste exercicio, e "un 93 % dos beneficios fiscais son de carácter social", destacou o conselleiro. Tamén confirmou que a lei de medidas administrativas e fiscais, que acompaña o proxecto de lei orzamentario, inclúe á parte das distintas rebaixas fiscais unha moratoria para a instalación de parques eólicos na comunidade.

Corgos asegurou que estas contas públicas, das que especificou que son as maiores da historia, permitirán a Galicia "volver á senda de crecemento san" e pasar da reactivación tras a pandemia do coronavirus á "recuperación", xa que se prevé superar os niveis de riqueza previa á pandemia "na primeira metade do ano". Ademais, puntualizou que a redución prevista na recadación de impostos non vai hipotecar" as necesidades de financiamento dos servizos públicos, porque se concentrarán nas rendas medias e baixas e espera que propicien un maior consumo e se traduza nun "incremento do PIB polo lado do gasto".

A Consellería de Sanidade, cun incremento do 6,2 %, é o cuarto departamento autonómico que menos crece nos orzamentos de 2022, despois de Facenda e Administración Pública (+2,1%), Infraestruturas e Mobilidade (+3,8%) e Mar (+3,5%).  

Na exposición ante os xornalistas, o conselleiro mostrou a distribución por consellerías, que reflicte incrementos do 23,4 % no medio Ambiente, Territorio e Vivenda, do 14,2 % en Política Social e do 11,4 % nos órganos superiores dependentes da Presidencia. Este último aumento, o relativo aos órganos da Presidencia, explicouno por crecementos nas partidas da Amtega (por dixitalización de servizos públicos, entre outros gastos) e en Emigración.  

Con 4.588,7 millóns de euros, a Consellería de Sanidade queda en practicamente a mesma cifra que no orzamento de 2021, cando contou con 4.587,1 millóns, se se teñen en conta os fondos covid. A alza é dun 6,2 % unha vez restados eses recursos extraordinarios. Despois deste departamento sitúase Cultura, Educación e Universidade, cunha repunta do 6,9 %, que xa iguala o do conxunto do orzamento.

Lugo e Ourense reciben o maior investimento per cápita

Lugo con 4.926 euros per cápita e Ourense con 4.809 volven ser as provincias con maior investimento previsto nos orzamentos da Xunta para 2022, fronte aos 3.760 que percibirá A Coruña e 3.584 de Pontevedra. Respecto ao volume de gasto, as que reciben maiores contías son A Coruña e Pontevedra, con 4.222 e 3.3379 millóns de euros respectivamente, mentres a Lugo correspóndenlle 1.611 millóns e a Ourense 1.470.  

"Nós si que apostamos polas provincias que necesitan máis cohesión territorial", reivindicou o novo conselleiro de Facenda, Miguel Corgos, en conferencia de prensa no Parlamento tras entregar o proxecto de contas públicas ao seu presidente. Neste sentido, Corgos contrapuxo esta aposta pola cohesión "co que fai o Goberno central" cos fondos de resiliencia, dentro do plan de recuperación.   En 2021, as cifras de investimento por habitante eran inferiores para o catro: 4.704 euros per cápita en Lugo, 4.461 en Ourense, 3.633 na Coruña e 3.439 en Pontevedra.

Feijóo e o seu equipo sóbense o soldo un 2%

O presidente da Xunta, Alberto Núñez Feijóo, e o resto de integrantes do seu Goberno sóbense o soldo un 2% nos orzamentos da comunidade autónoma para 2022. Esa porcentaxe será o que aumenten as nóminas de todos os funcionarios o ano que vén. Así o recolle o proxecto de contas públicas para Galicia que entregou este mércores no Parlamento galego o conselleiro de Facenda, Miguel Corgos.  

En concreto, Núñez Feijóo pasa de cobrar 78.089 euros a 79.651, mentres que o os seus dous vicepresidentes e o resto de conselleiros ven incrementados os seus salarios de 68.154 a 69.517 euros.   En canto ao persoal eventual de gabinete do Executivo autonómico, o proxecto de orzamentos galegos para o próximo exercicio recolle un total de 6,34 millóns, deles 1,73 correspondentes á Presidencia e 1,11 á Vicepresidencia 1ª da Xunta. Son un 50% máis que en 2021, cando a cifra se situaba en 4,24 millóns.

A Xunta rebaixará todos os tipos marxinais do IRPF nos tramos ata 35.200 euros

A Xunta rebaixará todos os tipos marxinais do imposto sobre a renda das persoas físicas (IRPF) nos tramos ata 35.200 euros, o que sitúa como rendas "medias e baixas", segundo concretou este mércores o conselleiro de Facenda, Miguel Corgos. Mentres, a reforma fiscal que incorpora a lei de medidas fiscais e administrativas que acompaña aos orzamentos da Xunta para 2022 prevé o mantemento "igual" no tramo de 60.000 e a creación dun novo por encima de 100.000 euros.

"Implantamos unha nova escala e rebaixamos os tipos dos tramos inferiores a 60.000 euros", precisou o conselleiro, para reivindicar que, segundo os cálculos do Goberno galego, esta medida beneficiará a 1,1 millóns de contribuíntes, "o 90 % da base fiscal do imposto". "Con esta decisión política Galicia reforza a súa posición como unha das comunidades autónomas con mellor tributación para rendas medias e baixas", incidiu. En concreto, o capítulo primeiro do título referido a medidas fiscais da coñecida como lei de acompañamento recolle, sobre o IRPF, esa modificación da escala autonómica ou complementaria do imposto. Entre outras medidas, tamén prevé a bonificación da taxa sobre xogos de azar, na súa modalidade de máquinas ou aparellos automáticos. Esta decisión está na liña das aprobadas pola Xunta neste ámbito en exercicios anteriores.

Pontón: "Feijóo insiste en pensar en Galicia en pequeno"

O rexeitamento ao proxecto de orzamentos galegos para 2022 remitidos pola Xunta ao Parlamento (e que previsiblemente se plasmará en senllas emendas de devolución, á espera dunha análise máis completa) foi compartido pola oposición autonómica (BNG e PSdeG), mentres que o PPdeG, grupo maioritario no Pazo do Hórreo, defendeu unhas contas que o seu portavoz, Pedro Puy, ve "acertadas" para a reactivación económica e social poscovid.

No polo oposto, tras a Xunta de Portavoces que organizou o pleno da semana próxima, a portavoz do BNG, Ana Pontón, replicou que os orzamentos que agora tramitará a Cámara (as comparecencias do Goberno para explicar os números dos seus distintos departamentos empezan o luns que vén) non son as contas que necesita Galicia para "a recuperación". Ao seu modo de ver, as contas evidencian a un xefe do Executivo, Alberto Núñez Feijóo, que "insiste en pensar Galicia en pequeno, cando máis se precisa pensar en grande".

Así, recalcou que estas non son as contas que necesita a Comunidade para a recuperación económica, "reforzar" os servizos públicos ou enfrontar retos estruturais como o demográfico. Pontón destacou que nin toda "a propaganda" que acompaña estas contas pode tapar que son "uns orzamentos de rutina que ignoran que hai que superar a maior crise social e económica en tempos de paz, e que non toman nota das leccións que deixa a pandemia nin no económico, nin no sanitario, nin no social".

Ao tempo, reiterou que a rebaixa do IRPF supón "un agasallo fiscal" para as rendas altas, pero é "irrelevante" para as familias e os traballadores que viven dunha nómina. Así mesmo, advertiu que inclúen "tres grandes mentiras". "Non é un orzamento histórico, xa que se se lle restan os máis de 200 millóns do IVE, xa computados noutros exercicios, é unha cifra inferior á de 2021. Pero é máis, se traducimos a euros constantes este orzamento é inferior ao de hai 12 anos", iniciou a súa enumeración. Como "segunda mentira", Pontón aludiu ao "investimento histórico en gasto social" e incidiu en que, sen cuestionar o paso en si, "o incremento das partidas corresponde en gran medida á actualización dos salarios dos traballadores de sanidade, educación ou servizos públicos". Finalmente, censurou a "mentira" de que se "reduce a débeda". "Feijóo triplicou a débeda e o único que hai é unha redución nos custos dos xuros que se pagarán en 2022", afeou.

O PSdeG insta a cambiar "as políticas austericidas"

Pola súa banda, o viceportavoz socialista, Pablo Arangüena, indicou que nos orzamentos hai "un compoñente de expansión en canto aos ingresos" e que están "inflados" debido ás achegas extra que chegan desde o Goberno central e da Unión Europea mediante os recursos de recuperación poscovid. Aínda así, Arangüena puxo en cuestión o deseño dunhas contas que, ao seu modo de ver e fronte ao que ocorre na contorna de España e da UE, asíntanse "nunha paradigma neoliberal". Para os socialistas galegos, a Xunta tería que "abandonalo" e optar por tratar de "estimular" o crecemento da economía e a mellora dos servizos públicos, pero "non o fai". Deste xeito, defendeu que o Executivo galego debería "cambiar as súas políticas austericidas, das que Feijóo é un alumno avantaxado", por "unha novo paradigma máis keynesiano e expansivo".

Uns orzamentos "acertados" para o PPdeG

"Pouca sorpresa" recoñeceu Puy que lle causan as críticas e a insatisfacción dos grupos da oposición en relación a unhas contas que agora iniciarán a súa tramitación parlamentaria co obxectivo de que a súa aprobación definitiva na Cámara prodúzase antes das festas do Nadal. Puy destacou que o Goberno que dirixe Feijóo "cumpre os seus compromisos" en diversos ámbitos, salientou as melloras das condicións salariais dos empregados públicos e o incremento de recursos humanos en áreas como a sanitaria, a educativa ou os servizos sociais, o que se plasma no gasto de persoal. Tamén defendeu a "subida importante do investimento" e unha política fiscal, con novas rebaixas de impostos, que busca favorecer o consumo e tamén o aforro para fomentar tamén por esta vía o investimento.

En definitiva, ao seu xuízo, as contas plasman a aposta pola reactivación "vía gasto e vía ingreso". "Son uns orzamentos acertados para o que se quere nestes momentos: reactivar e transformar Galicia", dixo.