E falamos coas peñas do Celta. Son optimistas á falta de dez partidos para o final de liga. E, se cadra, a volta de Iago Aspas alimenta ese optimismo. Aspas segue adestrando con normalidade. Fixéronse tres meses do seu último partido no Camp Nou. Ninguén podía esperar que o tempo de inactividade se prolongara tanto.

Sen ser preguntados directamente, todos os peñistas entrevistados mencionan o mesmo nome. 

Carla Domínguez, Lechuzas celestes: "Parece que Iago se recupera, é unha parte importante de xenio e garra dentro do vestiario".

Alejandro Gómez: "Hai cadro suficiente para conseguir a salvación de xeito cómodo, tamén a volta de Aspas é algo moi importante".

Ángel Prado, Comando Celta: "Agora volve Iago, dálle un plus ao equipo, cos partidos que quedan pódese acadar a salvación comodamente".

Lola Lago González, Carcamáns: "Xogadores como Maxi, Brais, xogan moito mellor tendo a Aspas ao lado, entón vai ser determinante, si ou si".

A simple presenza de Aspas aumenta o optimismo da afección, que prepara un recibimento o sábado como o da última vitoria contra o Sevilla.

Lola Lago, Carcamáns: "Imos estar ao 100%, porque sempre estivemos aí, agora hai que esperar que os xogadores poñan da súa parte".

Carla Domínguez, Lechuzas Celestes: "Para o equipo, que a afección estea enriba deles é importante, pero os xogadores teñen que pensar que ten que saír deles".

Iso si, os peñistas teñen claro que o seu apoio para o final da Liga pode dar puntos.

Ángel Prado, Comando Celta: "Temos que intentar que desde antes do partido xa noten que estamos con eles e marcar nós o primeiro gol".

Alejandro Gómez, Irmandiños: "O equipo nota cando estamos todos xuntos e empuxamos forte desde a bancada, e que o estadio estea cheo dálles esa confianza".