A vacina contra o coronavirus que desenvolve a Universidade británica de Oxford parece "segura" e "adestra" o sistema inmunolóxico, segundo revelan os achados das primeiras fases do estudo divulgados este luns.

Durante os ensaios clínicos realizados por expertos do prestixioso centro académico, 1.077 voluntarios mostraron que unha inxección os levaba a producir anticorpos e células brancas do sangue que poden combater o virus.

Estes descubrimentos, difundidos na revista médica The Lancet, considéranse "moi prometedores", aínda que é necesario levar a cabo ensaios a maior escala a fin de determinar se os anticorpos son suficientes para ofrecer protección a longo prazo contra a enfermidade.

A vacina, denominada ChAdOx1 nCoV-19, que está a ser desenvolvida a unha velocidade sen precedentes, está feita a base dun virus xeneticamente fabricado que ocasiona o arrefriado común en chimpancés.

Os científicos modificárono en gran maneira de forma que non poida ocasionar infeccións en persoas e para que se asemelle máis ao coronavirus.

Fixérono transferindo as instrucións xenéticas para a chamada "proteína do pico" do coronavirus (a ferramenta clave que este emprega para invadir as células de humanos) á vacina que están a desenvolver.

Desta maneira, esta vacina parécese ao coronavirus e o sistema inmune pode aprender a maneira de loitar contra el.

A pesar da relevancia destes primeiros descubrimentos, os expertos alertaron de que o estudo non leva operativo o tempo suficiente como para comprender se ofrece inmunidade a longo prazo, polo que haberá que esperar para saber se a vacina funciona como antídoto.

Canto aos efectos secundarios, os científicos determinaron que existen aínda que non se consideran perigosos. Nos seus ensaios detectaron que un 70 % das persoas que participaron no estudo desenvolveron febre ou dor de cabeza aínda que eses síntomas puideron ser tratados con  paracetamol.

Gran parte da atención no desenvolvemento dos antídotos ao coronavirus ata a data versou nos anticorpos, que son só unha parte do sistema de defensa inmunolóxico.

As vacinas que se consideran efectivas inducen á vez tanto os anticorpos como a resposta das células T, un tipo de células brancas do sangue que axudan a coordinar o sistema inmunolóxico e poden detectar que células foron infectadas e destruílas.

O estudo mostrou que o 90 % das persoas desenvolveu anticorpos neutralizadores tras serlles inxectada unha dose; deuse dúas doses a tan só dez persoas, das cales todas produciron máis anticorpos neutralizadores.

Pola súa banda, o primeiro ministro británico, Boris Johnson, dixo nunha mensaxe en Twitter que estes achados constitúen "unha noticia moi positiva" e eloxiou os "brillantes e pioneiros científicos e investigadores da universidade de Oxford".

"Non hai garantías, aínda non estamos aí, e serán necesarios máis ensaios, pero isto é un paso importante na dirección correcta", subliñou o líder conservador.