O estado de Dereito funciona na UE e o paralelismo entre ámbalas situacións está fora de lugar. Así de contundente foi este luns a Comisión Europea co goberno ruso. O seu ministro de Exteriores tentou deslexitimar o apoio comunitario ao opositor Alexei Navalny comparándoo co proceso aos líderes independentistas. Navalny foi envelenado, xulgado sen garantías e finalmente encarcerado.

Para Bruxelas, esta equiparación é o repertorio habitual de Moscú para atacar sen fundamento á Unión Europa de dobre moral.

O enfrontamento con Rusia colle forza e o alto representante exterior comunitario, Josep Borrell, denuncia que as relacións son tensas e empeoran rapidamente. Bruxelas xa estuda novas sancións contra o réxime de Vladimir Putin por perseguir a oposición e tenta coordinar a súa resposta cos Estados Unidos de Joe Biden.