A Axencia Europea do Medicamento (EMA) acaba de anunciar que o 29 de decembro manterá unha xuntanza extraordinaria en que podería autorizar a comercialización da vacina contra a covid−19 desenvolvida polas farmacéuticas Pfizer e BioNTech.

Tamén avalía a solicitude de comercialización da farmacéutica Moderna, que podería autorizarse o 12 de xaneiro.

A EMA confirmou que hoxe mesmo xa está avaliando as solicitudes de uso "condicionado" das vacinas. O estudo destas solicitudes requirirá de varias semanas para analizar toda a documentación presentada polas farmacéuticas.

Onte facíao Moderna, e hoxe mesmo a empresa estadounidense Pfizer e o seu socio alemán  BioNTech solicitaron ante as autoridades sanitarias europeas a autorización para o uso na Unión Europea da vacina contra a covid−19 que desenvolveron conxuntamente.

"Para nós como empresa asentada no corazón de Europa é un fito importante, seguirémonos esforzando por distribuír a vacina en todo o mundo tras unha posible autorización", declarou o presidente de BioNTech, Ugur Sahin.

Nun comunicado conxunto as dúas empresas expresaron a súa esperanza de que a vacina poida empezarse a usar en Europa antes do final do ano.

"No caso de que a EMA chegue á conclusión de que as vantaxes da vacina contra o coronavirus son superiores aos posibles riscos, o organismo recomendará unha saída ao mercado condicionada", estiman as empresas no seu comunicado sobre a decisión que esperan.

Xa hai unha semana Pfizer e BioNTech solicitaran unha autorización de urxencia para a súa vacina ante as autoridades sanitarias dos EUA. Alí, o organismo competente, a FDA, vaise reunir o 10 de decembro para tomar unha decisión.

En Europa, a EMA xa iniciou un procedemento especial para acelerar a autorización; no proceso para obter esta vía, os fabricantes de vacinas poden, antes de presentar a solicitude completa, adiantar datos sobre a eficacia da vacina e a súa seguridade en relación cos seus efectos secundarios.

No caso de que eses datos sexan suficientes pódese outorgar unha autorización condicionada.
A distribución e aplicación da vacina implicará un reto loxístico, xa que ten que conservarse a unha temperatura de menos 70 graos centígrados, e para poder garantila Pfizer e BioNTech desenvolveron un sistema de transporte cos seus propios refrixeradores.

A vacina de  Pfizer e BioNTech, na terceira fase dos estudos clínicos, mostrou unha efectividade do 95 por cento e ten que aplicarse distribuída en dúas doses para que ofreza protección contra o coronavirus.

Antes de coñecerse o anuncio das empresas, a ministra alemá de Investigación, Anja Karliczek, indicou que "se van a necesitar vacinas de distintos laboratorios" e advertiu de que no proceso de autorización se trata non só de avaliar a súa efectividade senón tamén de que asegurarse de que non presentarán efectos secundarios adversos e serán seguras e accesibles para todo o mundo.