EFE

Os embaixadores dos países da Unión Europea aprobaron este venres o mandato para negociar o convenio que a Comisión Europea e o Reino Unido deben pactar sobre Xibraltar como consecuencia do Brexit, segundo confirmaron a Efe fontes comunitarias.

Tras o visto e prace dos diplomáticos, os ministros da UE tamén deberán dar luz verde ao mandato nunha das súas próximas reunións, nun trámite meramente formal. Con todo, as negociacións sobre a situación na que quedará o Penedo tras o Brexit entre a Comisión Europea e o Reino Unido só poderán comezar unha vez que os ministros aproben de maneira formal o texto.

As fontes comunitarias indicaron que serán os ministros de Economía e Finanzas dos Vinte e sete quen dean o visto e prace definitivo na reunión que celebrarán o vindeiro martes en Luxemburgo. O pasado 31 de decembro, España e o Reino Unido lograron un principio de acordo sobre a rocha, pero está pendente do tratado que poidan alcanzar a Comisión Europea e o Goberno británico sobre a situación en que quedará Xibraltar, en cuestións como o tránsito fronteirizo.

Por ese motivo, o pasado xullo, o Executivo comunitario xa presentou a súa proposta de directrices para a negociación. O documento da CE expuña solucións para eliminar as comprobacións e controis físicos de persoas e mercadorías na fronteira terrestre entre España e Xibraltar, e garantía á vez a integridade do espazo Schengen e do mercado único.

As propostas incluían normas que establecían a responsabilidade en materia de asilo, retornos, visados, permisos de residencia, cooperación policial operativa e intercambio de información. Contemplábanse medidas noutros ámbitos, como o transporte terrestre e aéreo, os dereitos dos traballadores transfronteirizos, o medio ambiente, o apoio financeiro e o establecemento dunhas condicións de competencia equitativas.

Igualmente, prevían un mecanismo de gobernanza que incluía unha revisión da aplicación do acordo ao cabo de catro anos, a posibilidade de que ambas as partes rescindisen o acordo en calquera momento e a opción de suspender unilateralmente a aplicación do acordo en determinadas circunstancias.

Tras a publicación da proposta de Bruxelas no verán, o Reino Unido considerou que ese documento "socava a soberanía británica da rocha" e "entra en conflito co acordo marco alcanzado con España" en Noitevella. Xibraltar tamén manifestou a súa oposición porque entendía que o proxecto de mandato deixaba o control das súas fronteiras en porto e aeroporto en mans de España, e non de axentes europeos de Frontex, como se determinou no principio de acordo alcanzado o pasado 31 de decembro.

En efecto, o mandato que propuxo a Comisión sinalaba que o control e a vixilancia das fronteiras exteriores realizaríanse no porto, o aeroporto e as augas de Xibraltar "e correrían a cargo de España".

O proxecto do Executivo comunitario non mencionaba a Frontex, pero o comunicado que Bruxelas divulgou cando publicou en xullo a súa proposta de mandato si precisaba que en circunstancias nas que sexa necesario un maior apoio técnico e operativo, calquera Estado membro, incluída España, poderá solicitar a asistencia da Axencia Europea da Garda de Fronteiras e Costas. 

En calquera caso, os estados membros da UE analizaron desde xullo o proxecto de mandato da Comisión e introduciron cambios. As fontes comunitarias aseguraron que durante as discusións técnicas no Consello, que reúne aos países, introducíronse "unha serie de cambios" no texto, aínda que non especificaron cales son. 

Fontes diplomáticas constataron que os cambios non son "substanciais" e confiaron en que as negociacións sobre a futura situación de Xibraltar entre Londres e Bruxelas duren "pouco, meses", aínda que sinalaron que dependerá tamén "dos británicos". Tamén dixeron esperar que as conversacións empecen en outubro