A Comisión Europea (CE) autorizou hoxe a comercialización da vacina de Johnson & Johnson na Unión Europea (UE), despois de que a Axencia Europea do Medicamento (EMA) dixera que é segura e eficaz contra a covid-19. "Están a chegar ao mercado máis vacinas seguras e efectivas. Acabamos de autorizar o uso da vacina de Johnson & Johnson na UE", dixo en Twitter a presidenta da CE, Ursula Von der Leyen

Bruxelas asinou un contrato coa farmacéutica para adquirir 200 millóns de doses ao longo do ano, que a empresa espera empezar a entregar a partir do segundo trimestre e que se sumarán ás vacinas xa autorizadas de Pfizer- BioNTech, Moderna e AstraZeneca. Ademais, a CE poderá adquirir outros 200 millóns de doses adicionais se o considera conveniente.

A filial de Johnsson and Johnsson ten comprometidas as primeiras entregas coa UE dende o segundo trimestre, polo que chegarían como moi cedo o 1 de abril. A farmacéutica recoñece as dificultades loxísticas da súa vacina porque a última parte elabórase nos Estados Unidos.

En privado, diplomáticos europeos dubidaban que as primeiras doses das 200 millóns marcadas cheguen para mediados de abril e tampouco confían en que AstraZeneca cumpra coas súas entregas durante varias semanas.

A vacina de Johnson & Johnson necesita só unha dose, a diferenza das outras tres e ten unha eficacia contra o virus do 67 %. Trátase dunha eficacia inferior á de Pfizer- BioNTech (que é do 95 %) e a de Moderna (94,1 %), aínda que similar á de AstraZeneca (70 %).

Os efectos secundarios detectados durante eses ensaios con Janssen foron xeralmente “leves ou moderados” e “desapareceron un par de días despois da vacinación”, con dor no lugar da inxección, dores de cabeza, cansazo, dor muscular e náuseas, todos efectos habituais noutras vacinas, segundo informou a EMA.

Ademais, a axencia recomendou hoxe seguir administrando a vacina de AstraZeneca, despois de que varios países suspendesen a súa administración por problemas de coagulación diagnosticados tras a inoculación do fármaco.