CRTVG

Buscar

A UE aproba a vacina de AstraZeneca, no medio da lea pola entrega das doses comprometidas

Publicado o 29/01/2021 21:10
A UE aproba a vacina de AstraZeneca, no medio da lea pola entrega das doses comprometidas

A Axencia Europea do Medicamento (EMA) deu este venres luz verde ao uso condicional da vacina de AstraZeneca e a Universidade de Oxford na Unión Europea (UE), aínda que só para os maiores de 18 anos, ao considerar que non hai evidencias da súa eficacia por baixo desa idade.

A Comisión Europea terá agora que estudar as conclusións do comité de medicamentos humanos (CHMP) da EMA antes de dar definitivamente unha licenza condicional a esta farmacéutica, coa que se atopa negociando a entrega de todas as doses prometidas durante o primeiro trimestre deste ano.

Segundo os expertos da EMA, “non hai razóns para pensar que esta vacina non sexa efectiva contra as mutacións” que sufriu o SARS-CoV-2, como a nova cepa británica, aparentemente máis contaxios que as variantes anteriores do coronavirus, aínda que a axencia prometeu “seguir analizando esta cuestión” nas próximas semanas.

De lograr a licenza, a de AstraZeneca será a terceira vacina do covid-19 que se autoriza ao mesmo tempo e nas mesmas condicións para todos os países da UE desde que comezou a pandemia, sumándose aos antídotos desenvolvidos por Pfizer/BioNTech e Moderna.

O CHMP chegou a esta conclusión positiva a partir dos resultados combinados de catro ensaios clínicos, cuns 24.000 participantes en total, levados a cabo en Reino Unido, Brasil e Sudáfrica, e que mostraron que a vacina de AstraZeneca é “segura e eficaz” para previr o covid-19 en adultos.

A EMA subliñou que gran parte dos participantes nos estudos clínicos analizados tiñan entre 18 e 55 anos, polo que “non hai suficientes resultados entre os voluntarios maiores de 55 anos como para dar unha cifra sobre como funciona a vacina neste grupo”, pero sinalou que se espera que protexa" porque a vacina é segura, pero non di cuan eficaz é a partir desa idade.

No entanto, a EMA subliñou que espera máis información doutros estudos clínicos en curso, que inclúen voluntarios de “idade avanzada” nunha proporción suficiente como para sacar conclusións sobre a porcentaxe de eficacia.

Este antídoto, que demostrou unha eficacia de ao redor do 60% nos ensaios clínicos analizados, terase que administrar en dúas dose estándar, e a segunda inxección deberá poñerse entre 4 e 12 semanas despois da primeira.

“Con esta terceira opinión positiva, ampliamos aínda máis o arsenal de vacinas dispoñibles para os estados membros da UE e o Espazo Económico Europeo (EEE) para combater a pandemia e protexer aos seus cidadáns”, explicou a directora executiva da EMA, Emer Cooke.

Subliñou que, como con Pfizer e Moderna, o CHMP avaliou “rigorosamente” a vacina de AstraZeneca, e defendeu que “a base científica” do traballo da EMA apoia o seu “firme compromiso de salvagardar a saúde dos cidadáns” da UE.