CRTVG

Buscar

A semana máis negra do ano nas estradas galegas remata con oito falecidos

Publicado o 04/11/2019 14:50

Unha muller de 83 anos, de Ordes, faleceu atropelada ao baixar dun autobús. Viña de volta dunha excursión. Chovía, non había luz nin pasos para peóns e un vehículo levouna por diante. O outro condutor saíu ileso. Foi o último accidente desta ponte de Todos os Santos, que deixa un balance tráxico nas estradas galegas, cun total de catro mortos e catro feridos.

O sábado ao mediodía, na parroquia dos Ánxeles, en Brión, unha persoa morreu e outras dúas quedaron feridas de gravidade despois de chocar dous turismos. Unha delas tivo que ser evacuada no helicóptero do 061 e outra en ambulancia.

Moi próximo a este punto, cando aínda se estaba coas tarefas de limpeza da vía, sucedía un grave accidente. No concello de Ames, na estrada que une Negreira e Bertamiráns, un coche invadiu o carril contrario e bateu contra outro. Neste sinistro faleceron dúas persoas, que eran pai e filla. Outras tres quedaron feridas, e dúas deles houbo que liberalas.

O último accidente mortal do sábado produciuse en Ponte Caldelas, pouco despois das tres da tarde, na estrada PO-255, a dous quilómetros de Caritel. Dous coches bateron ao invadir un deles o carril contrario. Como consecuencia faleceu unha muller e un home quedou ferido de gravidade.

A Garda Civil lembra a importancia de extremar as precaucións co mal tempo. Se á ponte festiva sumamos os accidentes acontecidos o mércores en Viveiro, á altura de Begonte, onde morreu atropelado un home na A-6, o sinistro en Oia, en que faleceu o ocupante dun turismo que saíu da estrada e bateu contra un muro, e o de Trabada, onde un home de 81 anos perdeu a vida ao chocar contra outro vehículo, o total de vítimas mortais nesta última semana en Galicia foi de oito persoas.

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

04/11/2019