CRTVG

Buscar

A residencia do Incio, con 116 contaxios, e a de Outeiro de Rei, con 23, son os focos máis preocupantes en Lugo

Publicado o 31/08/2020 20:49

Este martes están citados os primeiros veciños que van facer PCR neste concello. En total faranse 200 probas. Quérese saber o alcance dun gromo que preocupa especialmente na residencia de anciáns. A do Incio ten nestes momentos un novo positivo. En total hai 116 contaxiados no centro. Oitenta e nove son usuarios e 27 son traballadores. A raíz deste gromo hai xa sete persoas falecidas. En Outeiro de Rei hai outra residencia con 23 positivos. A área sanitaria de Lugo é a que máis contaxios rexistra cada día.

Segundo o Sergas, este luns comezou en Lugo o cribado ao persoal de hostalería do barrio da Milagrosa. Noventa e sete camareiros están chamados a facer unha PCR para intentar illar os positivos e frear a transmisión do virus na que é xa a zona cero en contaxios da cidade. Por estas probas pasarán tamén traballadores moi expostos ao contacto coa poboación como axentes de Policía ou empregados municipais.

A actividade na cidade está limitada polas restricións sanitarias. Os 30 bares da zona só poden atender en terraza e á metade da súa capacidade. Algúns quéixanse, pero en xeral os clientes entenden a situación.

No resto da provincia preocupa a situación das residencias. No Incio hai xa 116 positivos. Oitenta e nove son usuarios e 27 traballadores. Dous dos enfermos morreron nas últimas horas. E total xa son sete os finados no gromo.
Este martes comezan as PCR aos veciños do concello.

E na residencia de Outeiro de Rei, hai 23 contaxiados. 18 son anciáns e cinco son traballadoras.

Por último, o gromo de Monforte rexistra 11 positivos máis dende o venres. En total xa son 115 os enfermos.

Segundo o Sergas, Lugo aumentou os casos activos en 55 nas últimas 24 horas. En total, hai nestes nestes momentos 730 casos activos.

Noticias web

31/08/2020