A produción de vehículos ascendeu en marzo en España a 226.958 unidades, un 56,8 % máis que o mesmo mes do ano anterior, segundo datos da asociación de fabricantes Anfac. Hai que ter en conta que a mediados do marzo pasado as plantas paralizaron a súa actividade no inicio do confinamento duro por mor da pandemia.

En relación coas cifras de marzo de 2019, a fabricación caeu o 13,3 %. A Anfac achaca este descenso á derruba da demanda, nacional e europea, e ao desabastecemento mundial de  microchips ou semicondutores, compoñentes empregados nos sistemas tecnolóxicos e informáticos dos automóbiles.

No acumulado do primeiro trimestre, a produción foi de 662.224 unidades, cifra que supón un retroceso do 12,5 % respecto a 2019 e o 2,5 % máis que entre xaneiro e marzo de 2020.

Crise dos microchips

Segundo Anfac, o problema dos semicondutores está a durar máis do estimado polos fabricantes nun primeiro momento e as previsións apuntan a que se vai prolongar "varios meses máis".

Esta situación levou varias compañías, como Renault, Stellantis ou Ford, a formular ERTE nas plantas de montaxe para afrontar as paradas de produción.

Caída das vendas

De todos os xeitos, o director xeral de Anfac, José López-Tafalla, considera que o principal problema é a "lenta recuperación que están a rexistrar as matriculacións en Europa e, sobre todo, en España".

No primeiro trimestre, o ritmo de vendas baixou respecto ao mesmo período de 2019, un 20,2 % en Francia, o 25,4 % en Alemaña, o 16,9 % en Italia, o 39,3 % no Reino Unido e o 41,3 % en España.