A Policía Local de Vigo disolveu nas últimas horas un botellón con 500 persoas e outros dez no centro da cidade. 

Moitas das actuacións tiveron lugar nas habituais zonas de copas do centro da cidade, pero a máis complicada foi a que tiveron que levar a cabo no monte Alba. Alí 500 persoas bebían e bailaban no exterior dun local sen medidas de seguridade. A situación complicouse porque un local da zona facilitoulles música e focos para amenizar a festa. Dáse a circunstancia de que o medio millar de persoas concentradas eran asistentes a varias despedidas de solteiro. O botellón prolongouse ata as 4 da madrugada, cando os axentes acudiron á zona.

As celebracións estanse a estender ao extrarradio, o que dificulta o traballo das forzas de seguridade. Pero ao mesmo tempo tamén no centro se suceden aglomeracións. Puntos como Teófilo Llorente, Cánovas del Castillo, Montero Ríos ou a Praza da Estrela están a ser vixiados especialmente. Nos últimos días a policía sancionou cinco locais en Vigo.