En Pontevedra, a policía investiga as circunstancias en que un home foi localizado cun disparo na cabeza. Foi un veciño da zona quen atopou o home malferido. Viu como saía dun coche e se dirixía a un banco onde quedou tirado e ensanguentado.

Foi trasladado primeiro ao hospital de Montecelo e, posteriormente, ao Álvaro Cunqueiro de Vigo pola gravidade das súas feridas. A Policía Nacional dirixe a investigación e nas últimas horas recadaba información entre os veciños do barrio onde apareceu e reside o home ferido.

O coche do home ferido permanece custodiado en dependencias policiais para ser inspeccionado e haberá que confirmar se a bala que impactou na cabeza se corresponde coas da arma atopada no vehículo da súa propiedade. Polo de agora, a policía non descarta ningunha hipótese e investiga se puido haber mais persoas implicadas nos feitos.