As Baleares non esixirán a partir do vindeiro domingo ningún test de covid-19 á poboación española vacinada que entre no arquipélago a través dos portos e dos aeroportos. Tampouco llelo pedirán a aquelas persoas procedentes de comunidades autónomas cunha incidencia inferior a 60 casos por 100.000 habitantes a 14 días, segundo anunciou a presidenta autonómica, Francina Armengol.

Iso si, as persoas vacinadas deberán acreditar que recibiron a primeira dose, polo menos, quince días antes da súa chegada ás illas, segundo detallou a mandataria rexional na feira de turismo Fitur que se celebra en Madrid.

O conselleiro balear de Turismo, Iago Negueruela, asegurou na conferencia de prensa que ofreceu xunto á presidenta que as illas, cun nivel por baixo dos 50 casos por 100.000 habitantes, están "preparadas" para recibir o maior número de turistas "posibles", tanto nacionais como internacionais.