CRTVG

Buscar

A plataforma Galicia Baleira demandará máis atención para o interior do país

Publicado o 05/02/2020 11:41
A plataforma Galicia Baleira demandará máis atención para o interior do país

As federacións provinciais de asociacións de veciños de Lugo e Ourense deron un paso adiante para defender a supervivencia da zona rural, reclamar máis atención aos problemas das provincias interiores e solicitar un incremento dos investimentos para frear o despoboamento das súas aldeas e a deterioración dos servizos públicos nas súas comarcas.

Para iso, segundo explicou o presidente da Federación de Asociacións de Veciños de Lugo, Jesús Vázquez, constituíron a plataforma Galicia Baleira, coa que pretenden reclamar a atención de "os dirixentes políticos" e esixir "unha discriminación positiva para o rural", co obxectivo final de frear o proceso de desertización humana que están a padecer amplas zonas de ambas as provincias.

"Xa temos os estatutos e un plan de traballo", explicou Jesús Vázquez, ademais de integrarse "nas plataforma da España Baleirada, onde xa están outras provincias como Teruel ou Soria".

Jesús Vázquez precisou que o obxectivo de Galicia Baleira é "traballar pola Galicia interior" e buscar apoio e investimentos para tratar de frear todos os problemas que están a lastrar o seu futuro, como o despoboamento, a perda de servizos públicos, a carencia de oportunidades ou a baixa natalidade.

"Para iso trataremos de estar con todos os representantes políticos, de todos os partidos e a todos os niveis, para facernos oír", dixo Vázquez, "porque temos unha batería de propostas moi ampla".

A presentación oficial da plataforma terá lugar mañá en Lugo, onde os seus representantes serán recibidos pola alcaldesa da cidade, Lara Méndez; a subdelegada do Goberno en Lugo, Isabel Rodríguez; o presidente da Deputación, José Tomé, e o delegado territorial da Xunta de Galicia, José Manuel Balseiro. 

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí