EFE

O secretario xeral da ONU,  António Guterres, encabezará o próximo 13 de setembro unha conferencia ministerial en Xenebra para recadar fondos cos que reforzar a axuda humanitaria en Afganistán, anunciou este venres a organización.

Segundo un portavoz, a reunión propón "un rápido aumento do financiamento para que a vital operación humanitaria poida continuar" e "facer un chamamento para un acceso humanitario pleno e sen obstáculos para garantir que os afgáns sigan recibindo os servizos esenciais que necesitan".

Nacións Unidas advertiu de que Afganistán se enfronta a unha posible "catástrofe humanitaria", con case a metade da súa poboación necesitada de asistencia, e subliñou a súa intención de seguir apoiando aos cidadáns do país.