Un voceiro do Ministerio de Defensa confirmou que a Mariña británica tomará medidas contundentes para preservar os dereitos do Reino Unido como estado costeiro independente se o país se separa da UE sen un acordo que regule, a partir do 1 de xaneiro, a futura relación comercial, e en particular o acceso á pesca.

Asegura que esas medidas inclúen embarcacións tanto de organizacions militares coma marítimas, coa potestade de deter, inspeccionar e confiscar todos os barcos pesqueiros da Unión Europea que operan na zona económica exclusiva británica, ata 200 millas da costa. Con todo, outras fontes próximas á operación matizan que en calquera caso ninguén vai disparar contra ninguén, nin sequera para advertir. De momento, tanto a UE coma o Reino Unido aceleran plans de continxencia por se, finalmente, non hai acordo comercial.

Ambas as partes teñen ata este domingo para decidir que rumbo deben tomar as negociacións. Deben determinar se paga a pena apurar o diálogo ata o ultimo día, o 31 de decembro, ou anunciar un consenso de mínimos que poida profundizarse en 2021, ou ben suspender definitivamente os contactos pola falta de avances. Nese caso, a conseguinte exclusión da frota europea dos caladoiros do Reino Unido afectaría a un cento de buques e máis dun milleiro de tripulantes galegos e suporía ademais prexuízos millonarios para a economía de Galicia.