Meira revive unha malla tradicional, como as que se facían antes, con máquinas que rondan os setenta anos. Recoñecida como festa de interese turístico de Galicia, celébrase desde hai vinte e oito anos. 

Coa meda comeza a malla tradicional de Meira, que rememora unha tarefa propia do campo de primordial importancia para a economía doméstica. Colaboraba todo o pobo e levábase a cabo sempre durante o verán. Nesta localidade luguesa concéntrana nun día. Comeza co amoreamento dos mollos. Tamén hai unha demostración do mazado cos malles. E de seguida comezan as máquinas a traballar.

As máquinas que empregan nesta malla de Meira teñen en torno a setenta anos. A súa aparición supuxo un gran avance porque facilitou a separación da palla e o trigo.

A malla de Meira está considerada de interese turístico de Galicia. Celébrase desde hai vinte e oito anos e cada ano atrae a moitos visitantes.

Paralelamente á malla, os amantes da maquinaria antiga tamén poden ver motores centenarios xunto con outros apeiros e tractores de época.