O prezo da electricidade no mercado almacenista (pool) para este sábado situouse en 110,22 euros o megawatt hora (MWh), un 7,4 % menos (uns 9 euros) que o que marca hoxe, co que rexistra a súa segunda caída consecutiva e afástase dos máximos de metade de semana.

Segundo os datos do operador do mercado ibérico OMIE consultados por Efe, en comparación interanual, o prezo do pool, referencia en España para calcular a tarifa regulada que se paga nuns 10 millóns de fogares, será aínda así máis do triplo dos 30,96 euros/MWh que custaba no cuarto sábado de 2020.

O prezo de mañá distanciarase, deste xeito, do máximo alcanzado o xoves (122,76 euros/MWh), e do segundo nivel máis alto da historia, os 118,99 euros/MWh deste venres.

Por franxas horarias, este prezo, no que se cruza a oferta dos produtores coa demanda prevista por Rede Eléctrica, oscilará mañá entre os 128,29 euros/MWh que custará entre as 1:00 e as 2:00 horas, e os 87,95 euros/MWh, entre as 18:00 e as 19:00 horas.

Para dar conta deste agosto histórico da factura eléctrica, a ministra para a Transición Ecolóxica, Teresa Ribera, comparecerá o vindeiro luns, a partir das 16:00 horas, no Congreso dos Deputados. 

O prezo da luz, que leva un mes de subas históricas, divide o Goberno de coalición sobre as fórmulas para abaratalo. A vicepresidenta Ribera presentará o luns no Congreso as medidas que vai adoptar e explicará as dúas leis que ultima o Executivo: unha sobre o fondo de solidariedade do sistema eléctrico e outra que limitará os beneficios das plantas de xeración que non emiten CO2.

Unidas Podemos propón abaratar a luz limitando o prezo da enerxía nuclear e hidroeléctrica, tal e como explicou esta mañá a ministra Ione Belarra.