A India rexistra unha nova marca no número de falecementos diarios por mor da covid. Con máis de 3.680 mortos, notificou a cifra máis alta ata o de agora, o que a mantén como o cuarto país con máis mortes en cifras totais, por detrás dos Estados Unidos, o Brasil e México.

Despois de que o sábado se superaran por primeira vez os 400.000 contaxios diarios, os novos casos sitúanse en 392.488, segundo os datos do Ministerio de Saúde indio.

Nas últimas horas chegaron novas remesas de subministracións médicas procedentes de Alemaña, Uzbequistán, dos Estados Unidos e Bélxica. En total chegaron 9.000 antivirais de Remdesivir que envía a Unión Europea, ademais de 120 ventiladores, 28 toneladas de equipos médicos, xeradores de osíxeno para centros médicos, cilindros de osíxeno, concentradores e reguladores, entre outros.

Ante esta situación, a India pon o foco na campaña de vacinación de toda a poboación adulta, dando inicio o sábado a unha nova fase que abarca os cidadáns de entre 18 e 44 anos. Con todo, a falta de doses suficientes reportada por varias rexións levou a que os datos da xornada de onte non mostrasen un aumento no número de inoculacións diarias, mantendo a media habitual de 1,8 millóns de doses nas últimas 24 horas, que elevan o total desde xaneiro ata os 157 millóns de vacinas.

Durante o sábado, máis de 84.500 persoas que pertencían ao grupo de entre 18 e 44 anos recibiron a súa primeira dose dunha das vacinas dispoñibles na India, a fórmula Covishield de AstraZeneca, que fabrica o Instituto Serum da India (SII), ou Covaxin, do laboratorio indio Bharat Biotech; ao que se sumou onte a chegada do primeiro cargamento importado da rusa Sputnik V. Con todo, aínda queda lonxe a meta inicial de vacinar 300 millóns de persoas para o mes de xullo.