Máis de 29.400 mortes producíronse nas residencias de maiores no que vai de pandemia en España
• O Ministerio notifica 74.347 contaxios menos tras eliminar Cataluña casos duplicados
As comunidades autónomas notificaron este martes ao Ministerio de Sanidade 2.662 novos casos de COVID-19 nas últimas 24 horas. A cifra total de contaxios en España elévase a 3.130.184 desde o inicio da pandemia, segundo as estatísticas oficiais.
Con todo, os datos totais son inferiores aos de onte (3.204.531, unha diferenza de 74.347), xa que Cataluña "eliminou casos duplicados", segundo explica o Ministerio. "Estes duplicados xeráronse ao actualizar a información de casos xa rexistrados no sistema informático cun código de identificación diferente ao asignado orixinalmente. Procedeuse a corrixir as series de datos", detalla o Ministerio.
A incidencia acumulada nos últimos 14 días por 100.000 habitantes sitúase en 168, fronte a 175 onte. Nas pasadas dúas semanas rexistrouse un total de 79.209 positivos.
No informe deste martes engadíronse 192 novos falecementos, en comparación con 443 o martes pasado. Ata 69.801 persoas con proba diagnóstica positiva faleceron desde que o virus chegou a España, de acordo cos datos recollidos polo ministerio. Na última semana faleceron 686 persoas con diagnóstico de COVID-19 positivo confirmado en España.
Actualmente, hai 11.246 pacientes ingresados por COVID-19 en toda España (11.754 onte) e 2.796 en UCI (2.923 onte). Nas últimas 24 horas, producíronse 909 ingresos (764 onte) e 1.313 altas (570 onte).
A taxa de ocupación de camas por coronavirus sitúase no 8,94 por cento (9,36% onte) e nas UCI no 26,99 por cento (28,09% onte).
Case 30.000 mortos nas residencias
E por primeira vez, o Goberno deu hoxe o dato oficial de persoas que faleceron en residencias de maiores desde o inicio da pandemia. Foron case 30.000 de marzo a febreiro; exactamente 29.408.
Segundo un informe cos datos agregados remitidos polas comunidades autónomas ao IMSERSO sobre a situación dos centros residenciais do seu territori, en 2020 faleceron en residencias de maiores un total de 16.281 persoas con Covid-19 confirmado, e outras 9.859 con síntomas compatibles. Ademais, desde que comezou o ano 2021 e ata o 21 de febreiro, faleceron por Covid-19 un total de 3.268 maiores en residencias, sendo a letalidade nestes centros do 18,7% en 2021 fronte ao 23,7% de 2020.